Monday, July 9, 2018

360 with Susil Premajayantha ( 09-07-2018 )

CHAPA also on Swarnavahini Sangramaya, Aug 30, 2016, P7

CHAPA also on Swarnavahini Sangramaya, Aug 30, 2016, P6

CHAPA also on Swarnavahini Sangramaya, Aug 30, 2016, P5

CHAPA also on Swarnavahini Sangramaya, Aug 30, 2016, P4

CHAPA also on Swarnavahini Sangramaya, Aug 30, 2016, P3

CHAPA also on Swarnavahini Sangramaya, Aug 30, 2016, P2

CHAPA also on Swarnavahini Sangramaya, Aug 30, 2016, P1

Sunday, June 17, 2018


ඝෝඨාභය, කුමාර් ගුණරත්නම් සහ දෙරණ! 

කණිෂ්ක ජයලත් නම් වූ පුද්ගලයෙක් පළ කොට තිබෙන post එකකින් දැක් වෙන්නෙ, ''දෙරණට අභියෝගයක්, 360' ට ඝෝඨාභය ගෙනැල්ලා ඩිල්කාටයි චාපාටයි පුළුවන් ද කොන්ද කෙළින් තියන් පහත comments වල තියෙන ප්‍රශ්න අහන්න'' කියල.
මම මේ සටහන තියන්න හිතුවෙ ඔය post එක ගැනවත්, එය දාපු කෙනා ගැනවත්, ඊට comment කරන කීප දෙනා ගැනවත් උනන්දුවකින් නෙවෙයි, මෙතැනින් ඉතාමත් ම වැදගත් දේශපාලන සංවාදයකට දොරක් ඇරෙන නිසා. ඔය post එකේ යටි පෙළ අරුත තමයි, හිටපු ආරක්ෂක ලේකම් ඝෝඨාභය රාජපක්ෂ සමඟ දෙරණ ට තියෙන සම්බන්ධතාව හෝ වෙනත් හේතු මත ඔහු දෙරණ 360' තුළ ප්‍රශ්න කිරීමකට ලක් වෙන්නෙ නැහැ කියන එක. හැබැයි, '' කොන්ද කෙළින් තියන්...'' කියන කොටසෙන් කියවෙන්නෙ, 360' කොන්ද කෙළින් ප්‍රශ්න කරන වැඩ සටහනක් කියන එක. ඒකනෙ, ඝෝඨාභයවත් 'එහෙම' ප්‍රශ්න කරන්න අදාළ post කරුවා අභියෝග කරන්නෙ.
ඒත් ඔහු හෝ ඔහු අනුව හිතන කිසිවෙක් ඒ වැඩ සටහන අගය කරමින් හෝ එය නිවැරදිව තක්සේරු කරමින් මෙතෙක් අදහස් පළ කර නැහැ, ඒ අස්සෙ, උදාහරණයක් විදිහට, විමල් වීරවංශ ට කැමති අය වෙනම, විමල් වීරවංශ එක්ක තරහ අය වෙනම ආදී වශයෙන් තමයි තම තමන්ගෙ අදහස් ඉදිරිපත් කරන්නෙ. 
මෙයින් කියවෙන්නෙ යම් මට්ටමක දේශපාලන දැනුමක් තියෙන බව සහ තම තමන් වෙන ම දේශපාලනයක නිරතව ඉන්න බව පෙන්වන මේ post කරුවා වගේ අය අන්තිම බංකොලොත්. ඔවුන් සම්ප්‍රදායික UNP හෝ SLFP ඡන්ද දායකයන් ට වඩා අනතුරු දායකයි. හේතුව පුළුල් දේශපාලන සංවාදයකට අවශ්‍ය ඉඩ ඔවුන් නොදැන ම අහුරලා දානවා. ඔවුන් වමේ කතාවකුත් කියන නිසා තත්වය තවත් අවුල් වෙනවා.
ඒ අස්සෙ 'කාන්ට්' කියවනවා වගෙ එකක් කරන තරුණ කණ්ඩායම් X හොල්මං එක්ක තැන තැන ඒ විදිහට ම හැසිරෙනවා. 
දැන් මේ අනුව දේශපාලන නපුංසක තත්වයක් රට තුළ නිර්මාණය වෙනවා! ඒ කියන්නෙ දකුණත් නෙවෙයි, වමත් නෙවෙයි, ඒ මැද ත් නෙවෙයි, කොටින්ම අවතැන් දේශපාලනයක්! 
ඒ අස්සෙ සංස්කෘතික කුහකකම් සහ ලිංගික ඊර්ෂ්‍යාව වගෙ සියුම් සාධකත් වැඩ කරන්න ගන්නවා!
ඊළඟට, මම පුද්ගලිකව දෙරණ සමඟ ගනු දෙනු කරන්න ගන්නෙ 2015 මැද පහුවෙන හරියෙදි. ඒ දෙරණ අලුත් පාර්ලිමේන්තුව ත් එක්ක. 2000 වගෙ ජනප්‍රිය මාධ්‍යයත් එක්ක වැඩ කරන්න අරන්, 2001 'නිදහස්' පටන් අරං මම මහපොළොවෙ මාධ්‍ය දේශපාලනයක් ආරම්භ කෙරුවා, මාව දන්න හුඟාක් අය හිතුවෙ මට කෙළවෙලා පාරට බැහැල කියල, මිනිස්සු අපිව මග හැරියා. වැඩියෙන් ම අපේ දේශපාලන ක්‍රියාකාරකම් වලට හරස් වුණේ ඊනියා සිංහල බෞද්ධ කණ්ඩායම් සහ ජවිපෙ. ඒ ගමන අපි 2011 දක්වා අඛණ්ඩව කොහොමත් ආවා.
2015 තමයි මම නැවත පුර්ණ මාධ්‍ය ක්‍රියාකාරකම් පටන් ගන්නෙ. මම මෙවර, ජනප්‍රිය මාධ්‍ය එක්ක වැඩ කරමින් යෝජිත දේශපාලන අරගලය කරනවා කියන තැනට එන්නෙ අන්න අර ඉතිහාස මග පෙන්වීම නිසා. කොහොමත් ජනප්‍රිය මාධ්‍ය, ලෝකය පුරාම ඒ ඒ දේශපාලන තත්වයන් ට සහ ආර්ථික ව්‍යුහයන් ට අනුකූලයි. ලංකාවෙත් එහෙමයි. මම මේ අවුරුදු තුන තුළ කරක් ගහපු හැම මාධ්‍යයකම තත්වය අඩු වැඩි වශයෙන් සමානයි. ඒවා වාණිජ අරමුණු සහිත ව්‍යාපාර. 
ඒ අතර දෙරණ විවිධ දේශපාල අත්හදා බැලීම් කරන්න පුළුවන් සාපේක්ෂ ''හොඳ වැඩ බිමක්'', උදාහරණයක් විදිහට ආරම්භක වැඩ සටහනේ සිට මම දෙරණ අලුත් පාර්ලිමේන්තුව ට ආරාධිතයෙක් විදිහට සහභාගී වුණා. මට කවදාවත් කවුරුවත් කිසිම බලපෑමක් කරලා නැහැ. එය ඉතාම ප්‍රශස්ත මට්ටමක්. ඊළඟට තවත් වැඩසටහන් කීපයකට ත් දෙරණ ආරාධනා ලැබුණා, ඒ විදිහටම කොන්දේසි විරහිතව.
දැන් මම වෘත්තීය මට්ටමෙන් Insight සහ 360' මෙහෙය වන්න දෙරණ ට සම්බන්ධ වෙලා ඉන්නවා. අදාළ නිෂ්පාදකවරු ඉතාම විවෘත මනසකින් සහ වෘත්තීය මට්ටමකින් එකට වැඩ කරනවා, වෘත්තීය සීමාවන් මිස කිසිම පුර්ව කොන්දේසි අප අතර නැහැ. මෙය, දැනට, ඉතාමත් ම සාධනීය සහ පර්යේෂණාත්මක තත්වයක්.
මම ත් සම්බන්ධ වුණු 360' වැඩ සටහන් කීපය ඒ ඒ ආරාධිතයන් ට අනුව වෙනස් වුණා, එය සාපේක්ෂ තත්වයක් මිස පුර්ව සැලැස්මකට අනුව සිදු වුණේ නැහැ. අහවලා මෙහෙම ප්‍රශ්න කරමු, අහවලා හිර කරමු, අහවලා ට මෙහෙම ගහමු! වගේ ප්‍රාථමික මට්ටමකට අපි කවුරුවත් කවදාවත් වැටෙන්නේ නැහැ!! අපි කණ්ඩායමක් විදිහට ඉහළ සංවාදයක් ගොඩ නගා ගන්න උත්සහ කරමින් ඉන්නෙ!!!
ඔය post කරුවා ට කියන්නෙ! දැන් ඝෝඨාභය 360' ට ගෙන්වුවොත් මේ 
ටිකමයි වෙන්නෙ. එකම දේ දෙරණ ට, පිළිගත් මාධ්‍ය ආයතනයක් හැටියට ඒ ඒ ආරාධිතයන් සමඟ හොඳ අවබෝධයකින් කටයුතු කරන්න සිද්ධ වෙනවා. උදාහරණයක් විදිහට, ඔය post කරුවා ත් මත වාදීව සම්බන්ධ බව පෙනෙන පෙරටුගාමී සමාජවාදී පක්ෂයේ නායක කුමාර් ගුණරත්නම් දෙරණ Insight වැඩ සටහනට ගෙන්නුවා, 2018 මාර්තු අන්තිම හරියෙදි. ඒ සාකච්ඡාවෙ අන්තිම කොටසේදී මම ඔහු ප්‍රශ්න කෙරුවෙ, වමට එරෙහි එක්සත් ජාතීන් වෙනුවෙන් පෙනී හිටින්නෙ ඇයි කියල, දෙමළ අතුරුදන් වුවන් පිළිබඳ ප්‍රශ්නයට සම්බන්ධ පෙරටුගාමි ස්ථාවරය තමයි එහෙම අභියෝගයට ලක් වුණේ. ඔහු වැඩ සටහන විකාශ වෙන්න පෙර ( එය දැනට පටිගත කරන වැඩ සටහනක් ) ඒ කොටස විශේෂ ඉල්ලීමක් කරලා ඉවත් කර ගත්තා. 
මේ ඝෝඨාභය නෙවෙයි, කුමාර් ගුණරත්නම්!
මම මේ උදාහරණය ගෙනාවෙ ඒ ඒ තත්වයන් එච්චර සරල නැහැ කියන එක පෙන්වන්න. නිකං හතර අතට ගල් ගහන්නෙ නැතුව, අපි ප්‍රබුද්ධ දේශපාලන සංවාදයක් ගොඩ නගමු! ඉතිහාස බල කිරීම ඒකයි!
CHAPA, June 17, 2018

Kapila M Gamage නැමැත්තා ට ලියමි!

ඊයේ දෙරණ 360 වැඩසටහනේ දී දිල්කා සමන්මලී හා චාපා බණ්ඩාර කියන දෙදෙනා සුජීව සේනසිංහ කියන දේශපාලකයා සමග කල සාකච්ඡා මෙහෙයවීම විද්‍යුත් මාධ්‍යයක සම්මුඛ සාකච්ඡාවක් හෝ සාකච්ඡාවක් ඉතා දුර්වල ආකාරයෙන් මෙහෙයවන්නේ කෙසේද යන්නට මාහැඟි උදාහරණයක්. සාමාන්‍යයෙන් විද්‍යුත් මාධ්‍යයක් සඳහා කෙනෙකුට ආරාධනා කරන්නේ ඔහු හෝ ඇය ලවා කිසියම් කාරණයක්, සිදුවීමක්, දැනුමක් ගැන සවිස්තරාත්මක තොරතුරු ග්‍රාහකයා වෙනුවෙන් ලබා ගැනීම සඳහා. එහිදී මෙහෙයවන්නා කළයුතුවන්නේ ආරාධිතයා කතා කරවීම හා ඔහුට හෝ ඇයට කතාකරන්න අවකාශය නිර්මාණය කරදීම. මැදිරියක් යනු කෙනෙකුට වැටෙන තුරු පහර දෙන බොක්සිං වළල්ලක් නොවෙන බව ලංකාවේ බොහෝ වැඩසටහන් මෙහෙයවන්නෝ දන්නේ නෑ.
වැඩසටහන සඳහා වෙන්කර ඇති ගුවන් කාලයෙන් තුනෙන් දෙකක කාලයක් වෙන් විය යුත්තේ ආරාධිතයාට. එසේ නොවන්නේ නම් කතා කරන්නේ මෙහෙයවන්නා නම් ඇයි අපි ආරාධිතයෙකු කැඳවන්නේ. ආරාධිතයා කියන දේ නිවැරදි ද නැද්ද කියන එක පවා විනිශ්චය කරන්න මෙහෙයවන්නා විනිශ්චයකරුවෙක් නොවේ. අවසාන විනිශ්චයකරුවා වෙන්නේ ග්‍රාහකයා.
මාධ්‍ය මහත්වරුනි, නෝනාවරුනි, ලැරී කිං ගෙන් හා ටිම් සෙබස්තියන් ගෙන් බේසික් දේවල් ඉගෙන මෛක්‍රෆෝනය හා කැමරාව ඉදිරියට එන්න. මීඩියා එක ලස්සන තැනක් වේවි
( උපුටා ගැනීම – Kapila M Gamage fb wall )
Kapila M Gamage නැමැත්තා ට ලියමි!
අමාත්‍ය සුජීව සේනසිංහ සමඟ, 2018 ජුනි 11 රාත්‍රියේ පැවතී, දෙරණ 360′ සංවාදය සම්බන්ධයෙන් මේ එනවිට බොහෝ දෙනා තම අදහස්, විවේචන සහ යෝජනා ඉදිරපත් කිරීම පුද්ගලිකව මා උනන්දුව ට පත් කරයි, එය ”යහපත් ප්‍රජාතන්ත්‍රවාදය” පිළිබඳ හොඳ පුර්ව ලක්ෂණයක් ලෙස, අවශ්‍ය නං ගණන් බැලිය හැකිය! ඒ අතර ඔබ ඉදිරිපත් කර තිබෙන මේ විග්‍රහය පිළිබඳ මගේ අවධානය දැන් යොමු වන්නේ, ඔබ කිසියම් න්‍යායාත්මක අගයක් මවා පෙන්වමින් කර තිබෙන ”ද්වේශසහගත අදහස් දැක්වීම” නිසාය. ජනමාධ්‍ය යනු ලෝකය පුරාම පර්යේෂණාත්මක ලෙස සංවර්ධනය (?) වෙමින් පවතින තවත් එක දේශපාලන විෂයකි. ඒ අනුව, දෙරණ 360′ ට අදාළව – රුපවාහිනි වැඩසටහනක්, විශේෂයෙන් ම රටේ ආර්ථිකය මාරාන්තික ලෙස සසල කළ ආර්ථික ඝාතක සිදුවීම් දාමයකට සම්බන්ධ බලයේ සිටින අමාත්‍යවරයෙකු සමඟ, එවැනි සංවාදයක් පැවැත්විය යුතු ආකාරය – මෙහෙය විය යුතු ආකාරය මෙන් ම එහි ආකෘතිය ද අදාළ වන්නේ යම් පර්යේෂණාත්මක තත්ත්වයකටය. උක්ත වැඩ සටහන ඉදිරිපත් කළ මාත් ඩිල්කාත් ඇතුළු දෙරණ 360′ නිෂ්පාදන කණ්ඩායම එකී මාධ්‍ය පර්යේෂණ කටයුත්ත, පවතින ”දේශපාලන මොහොත” ට අවශ්‍ය මට්ටමෙන් ගළපා සාර්ථකව සම්පුර්ණ කළ බව මම ඔබ ට යෝජනා කරන්නෙමි. ඔබ ඔය සඳහන් කරන, ” සාමාන්‍යයෙන් විද්‍යුත් මාධ්‍යයක් සඳහා කෙනෙකුට ආරාධනා කරන්නේ ඔහු හෝ ඇය ලවා කිසියම් කාරණයක්, සිදුවීමක්, දැනුමක් ගැන සවිස්තරාත්මක තොරතුරු ග්‍රාහකයා වෙනුවෙන් ලබා ගැනීම සඳහා. එහිදී මෙහෙයවන්නා කළයුතුවන්නේ ආරාධිතයා කතා කරවීම හා ඔහුට හෝ ඇයට කතාකරන්න අවකාශය නිර්මාණය කරදීම. මැදිරියක් යනු කෙනෙකුට වැටෙන තුරු පහර දෙන බොක්සිං වළල්ලක් නොවෙන බව ලංකාවේ බොහෝ වැඩසටහන් මෙහෙයවන්නෝ දන්නේ නෑ” යන ඊනියා න්‍යාය මෙතැන දී කොහොමවත් වලංගු නැත. පෙර සඳහන් කළ පරිදි, මේ රටේ සමස්ත ආර්ථිකය විකෘති කළ මහා ආර්ථික අපරාධයක් පිළිබඳ කරුණු අනාවරණය කර ගැනීමකට අදාළ මාධ්‍ය අභ්‍යාසයක් මිස විනෝදාත්මක සංවාද අත්දැකීමක් නොවේ. මම මේ දැනුදු කල්පනා කරන්නේ අමාත්‍ය සුජීව සේනසිංහ මෙහිදී සමාජ ගත කළ වැරදි අර්ථ නිරූපණ නිවැරදි කළ යුතුව තිබුණේ කෙසේද යන්න පිළිබඳවය.එය මට නං තවමත් මාධ්‍ය පර්යේෂණයකි. ඊළඟට ඔබ කියන ” වැඩසටහන සඳහා වෙන්කර ඇති ගුවන් කාලයෙන් තුනෙන් දෙකක කාලයක් වෙන් විය යුත්තේ ආරාධිතයාට. එසේ නොවන්නේ නම් කතා කරන්නේ මෙහෙයවන්නා නම් ඇයි අපි ආරාධිතයෙකු කැඳවන්නේ. ආරාධිතයා කියන දේ නිවැරදි ද නැද්ද කියන එක පවා විනිශ්චය කරන්න මෙහෙයවන්නා විනිශ්චයකරුවෙක් නොවේ. අවසාන විනිශ්චයකරුවා වෙන්නේ ග්‍රාහකයා” යන්න කිසිදු අර්ථයක් නැති කතාවකි. මේ වැඩ සටහන ට අදාළ ව, කාලය හිතා මතා, චේතනාන්විතව! නාස්ති කළේ ආරාධිතයා ය. තුනෙන් දෙකේ සුත්‍රය කෙසේ වෙතත් කාලය සාධාරණ ලෙස යොදා ගත යුත්තේ නිවැරදි තොරතුරු සමාජ ගත කිරීමට ය. ඔය ”අවසාන විනිශ්චයකරුවා යනු ග්‍රාහකයා!” යි යන ප්‍රබන්ධය සමාජ යහපත උදෙසා වන ”මාධ්‍ය වගකීමක්” බව ඔබ වැනි වැඩි හිටියෙකු තේරුම් නොගැනීම රටේ අනාගත පරම්පරාවන් හි අභාග්‍යයකි. අවසන් වශයෙන්, ඔබ සහ තවත් අය කරේ තබාගෙන සිටින ඔබ නොදන්නා ”ලැරී කිං” සාධකය වටහා ගැනීමට නං, ඔබ ලෝක දේශපාලනය සහ එහි ජනමාධ්‍ය සන්නිවේදනය, ”දේශපාලන විද්‍යාත්මකව” කියවා ගත යුතු බව ද අවධාරණය කරමි!
CHAPA
June 13, 2018

Thursday, May 24, 2018

දුම්බර, මරණිය අනතුර !

සංචාරක හෝටල් සහ නිවාඩු නිකේතන ඉදිකිරීම මෙන්ම වෙනත් ඊනියා සංවර්ධන කටයුතු හේතුවෙන් ද, ශ්‍රී ලංකාවෙ හදවත බඳු වූ, දුම්බර වනාන්තර හෙවත් නකල්ස් කඳු පන්තිය සිසාරා පැතිරෙන මහා වනාන්තරය, මේ වන විට බරපතළ අනතුරකට ලක් වෙමින් තිබේ!
ඒ අතර, ඊට මායිම් වන වතු ඉඩම් සමුහයක් විවිධ ව්‍යපෘති සඳහා, විවිධ පාර්ශ්ව කීපයකට ලබා දීමට වර්තමාන ආණ්ඩුව ගෙන ඇති තීරණයත් සමඟ ම එකී තත්වය වඩා අයහපත් අතට හැරෙමි තිබෙන බව අනාවරණය වේ. රාජ්‍ය වැවිළි සංස්ථාවේ සහ ඇල්කඩුව වැවිළි සමාගමේ කළමනාකරණ අයිතිය ට, පිළිවෙළින් යටත් කර තිබු, හෙක්ටයාර් 9675 සහ හෙක්ටයාර් 3693 න්, එසේ පැවරෙන ඉඩම් ප්‍රමාණය, පිළිවෙළින්, හෙක්ටයාර් 6192 සහ හෙක්ටයාර් 2363 කි, එනම් සමස්තය, හෙක්ටයාර් 8555 හෙවත් අක්කර 21400 කි.
රාජ්‍ය වැවිළි සංස්ථාවට අයත් එම ඉඩම්, අලකොළේ, කොටගල, ගල්පිහිල්ල, ගෝමරේ, හග්ගල්ල, හෙයාර්පාක්, හුන්නස්ගිරිය, කැලෑබොක්ක, මැදවත්ත, නිකොලෝය, රංගල සහ ඕපල්ගල ප්‍රදේශවලද, ඇල්කඩුව වැවිළි සමාගමට අයිති අදාළ ඉඩම් බණ්ඩරපොළ, ඇල්කඩුව, හුණුගල, පිටකන්ද, රත්වත්ත, සැලගම, හපුගස්පිටිය, මිල්ලවාන, නාලන්දා වතු වශයෙන් ද පැතිර පවතී. මේ අතර හෙයාපාර්ක් වත්තෙන් අක්කර 900 ක් කුකුළු ව්‍යාපාරයකට ක්‍රිස්බෝ සමාගමට ද, රත්වත්ත වතු යාය, යම් යම් කණ්ඩායම් සඳහා රෝස තිරුවාණා කොල්ලකෑමට ද ලබා දී තිබේ. මිට අමතරව මැදවත්ත වතුයාය ඇතුළු ස්ථාන කීපයක් හෝටල් ඉදිකිරීම සඳහා වෙන්කර තිබෙන බව ද අනාවරණය වේ.
මෙම දුම්බර වනාන්තර පද්ධතිය පිළිබඳ සංවාදය දුරාතීතය දක්වා ම දිව යන අතර, එය බ්‍රිතාන්‍ය පාලකයන් ගේ විශේෂ අවධානය ට ද යොමු වී තිබිණි. වන විනාශය ආරම්භ කරමින් රට ට වැවිළි කර්මාන්තය හඳුන්වා දීමට පියවර ගත් බ්‍රිතාන්‍ය පාලකයන් පවා, අඩුම තරමේ තම උවමනාවන් සඳහා හෝ වනාන්තර පද්ධති ආරක්ෂා කිරීම ට, අදට වඩා සාපේක්ෂ සාධනීය පියවර ගත් අවස්ථා දැකිය හැකිය.
කෙසේ වෙතත්, 1995 දී, එතෙක් පැවති 1907 අංක 16 දරන කැලෑ ආඥා පනත සංශෝධනය කෙරුණු අතර, එහි 3 අ (1) වගන්තිය යටතේ, 2000 මැයි 5, අංක 1130/22 ගැසට් පත්‍රයෙන්, මෙම දුම්බර වනාන්තරය ලංකාවේ ප්‍රථම සංරක්ෂිත වනාන්තරය ලෙස ප්‍රකාශයට පත් කෙරිණි. මධ්‍යම පළාතට සහ එහි මහනුවර සහ මාතලේ දිස්ත්‍රික්ක වලට අයත් එකී සංරක්ෂිත භුමි ප්‍රමාණය හෙක්ටයාර් 17825 කි. කෙසේ වෙතත් මෙම වනාන්තරයේ සමස්ත ප්‍රමාණය හෙක්ටයාර් 21000 ක් වන අතර එය රටේ සමස්ත භුමි ප්‍රමාණයෙන් 0.32% කි. මෙම රක්ෂිත වනාන්තරය නම් කරන විටත් ඒ තුළ හෙක්ටයාර් 2000 පමණ වූ රජයේ සහ පුද්ගලික ඉඩම් ප්‍රමාණයක් තිබුණු අතර ඒවා පියවරෙන් පියවර වන රක්ෂණ දෙපාර්තමේන්තුව ට පවරා ගැනීම ට නියමිතව තිබු මුත් එකී ක්‍රියා දාමය ද හරියාකාරව සිදු වී නොමැති බව අනාවරණය වී තිබේ. මේ අතර, වසර 2000 වන විට දුම්බර වනාන්තරය UNESCO ස්වභාවික ලෝක උරුමයක් ලෙස ද නම් කෙරුණු අතර, මෙවැනි ලෝක උරුම නම් කිරීම් පිළිබඳව ද අපට වෙනම පුළුල් සාකච්ඡාවක් තිබෙන බව පමණක් මෙහි සටහන් කර තබමි.
මේ සියල්ල මැද, මහනුවර දිස්ත්‍රික්කයේ, මිණිපේ, උඩුදුම්බර, පාත දුම්බර, පන්විල ප්‍රාදේශීය ලේකම් කොට්ඨාස හතර සහ මාතලේ දිස්ත්‍රික්කයේ, උකුවෙල, රත්තොට, ලක්ගල, පල්ලේගම, විල්ගමුව ප්‍රාදේශීය ලේකම් කොට්ඨාස පහ පුරාවට පැතිර තිබෙන මෙම මහා කඳුකර වන තීරය, ඊට ම අවේනික ශාඛ සහ සත්ත්ව විශේෂයන්ගෙන් ගහනය, ජෛව විවිධත්වයෙන් අනුනය. ලංකාවේ දිග ම ගංගාව වන මහවැලිය පෝෂණය කරන සමස්ත ජල පෝෂක ප්‍රදේශයෙන් 30% පමණ ප්‍රමාණයක් ආවරණ කරන්නේ ද මෙම කඳුකර දුම්බර වන යාය බව ඇතැමෙක් නොදන්නවා විය හැකිය.
මෙම අතිශය සංවේදී මහා වනාන්තරය දිගු කාලයක පටන් වන ඝාතකයන් ගේ සහ තවත් ජාවාරම් කරුවන්ගේ අතවරයට ලක් වෙමින් තිබෙන්නේ දේශපාලන බල අධිකාරියේ ඍජු මැදිහත්විමෙන්ය.
රාජ්‍ය ව්‍යවසාය හා මහනුවර සංවර්ධන හිටපු ඇමති කබීර් හෂීම් සහ වර්තමාන ඇමති ලක්ෂ්මන් කිරිඇල්ල, දුම්බර රක්ෂිතය මායිමේ වතු ඉඩම් අක්කර 21400 ක් තම නෑ සිය හිත මිතුරන් ට පවරෑ දීමට කටයුතු කර තිබෙන්නේ ද මෙවන් මරණිය පසුබිමකදීය.
ඒ අනුව, විශේෂයෙන්ම, ගිරිස්වත්ත, කොස්ගොල්ලවත්ත, කෝබට් ගැප්, අට්ටලවෙට්ටුව, ගෝනමඩවත්ත පතන සහ සුදු ගල ප්‍රමුඛ වන ප්‍රදේශ, එනසාල් ඇතුළු විවධ වගා සිහින මවන වැවිළි කරුවන්ගේ, හෝටල් හිමිකරුවන්ගේ සහ තවත් ව්‍යාපාරිකයන්ගේ මෙන්ම ඔවුන්ගේ තැරව් කරුවන්ගේ ද රුදුරු ග්‍රහණයට වේගයෙන් නතු වෙමින් තිබීම ජෛව ගෝලයම කම්පා කරවන අනතුරුදායක තත්ත්වයකි.
ඉතිං, මේ මොහොතේ ජිවත්වන මිනිසුන් ලෙස, ස්වභාව ධර්මය ට එරෙහි මේ මහා අපරාධය ට එරෙහි ව අපට කළ හැක්කේ කුමක් ද?
CHAPA, May 18, 2018

CHAPA on ''How to drive!'' on nidahas, May 24, 2018

Wednesday, May 16, 2018

CHAPA on Derana Aluth Parlimenthuwa, අධි නීතිඥවරු? Oct 28, 2015

විජේදාස යනු 'කුමක්ද?'

අමාත්‍ය විජේදාස රාජපක්ෂ යනු, මේ මොහොත ගෙවා දමමින් තිබෙන ලාංකේය දේශපාලනය තේරුම් ගැනීම සඳහා අවධානයට ගත හැකි - ගත යුතු තවත් එක් ප්‍රබල දේශපාලන සාධකයෙකි!
හදිසියේ ම යහපාලන ආණ්ඩුවේ ක්‍රියාකළාපය හෙළා දකිමින් සහ එහි අමාත්‍ය ධුරයක් දැරීම ලැජ්ජාවක් බව පවසමින් ''එළියට බහින'' විජේදාස රාජපක්ෂ අමාත්‍යවරයා, ඒ මොහොතේ පටන් හිටපු ජනාධිපති මහින්ද රාජපක්ෂ සමඟ පන්සල් වල හැසිරෙනු පෙනිණි, ගෝඨාභය සහ බැසිල් වැන්නවුන් සමඟ ද සම ව සැරිසරන ගතියක් පෙනිණි. ඒකාබද්ධයේ කතිකයෙන් වහා, වේගවත් කතා පවත්වමින් තම විප්ලවීය සගයා වර්ණනා කරන්නට පටන් ගත්හ. ගත වුයේ ඉතාමත්ම කෙටි කාලයකි, මෙන්න දැන්! හිටිහැටියේම ඔහු යළිත්, ඒ ප්‍රතික්ෂේපිත රනිල් - මෛත්‍රී ආණ්ඩුවේම අමාත්‍යවරයෙක් බවට පත්ව තිබේ. 
මෙය පුද්ගලික ප්‍රශ්නයක් යැයි ඔබ නිකමටවත් සිතන්නේ ද? නැත! මේ, රට මුහුණ දෙමින් තිබෙන මහා දේශපාලන ඛේදවාචකයේ තවත් එක පැති කඩකි. 
අපි මුලින්ම විජේදාස රාජපක්ෂ ට පැවරෙන අමාත්‍යංශ වගකීම සැලකිල්ලට ගනිමු;
යහපාලන ආණ්ඩුවේ දෙවැනි කැබිනට් සංශෝධනයෙන් ( විද්‍යාත්මක?), එනම් 2018 මැයි 1 දා, ඔහු උසස් අධ්‍යාපන සහ සංස්කෘතික කටයුතු අමාත්‍යධූරයේ දිවුරුම් දුන්නේය. එකී කැබිනට් සංශෝධය ට අදාළ ව, 2018 මැයි 12 දින මධ්‍යම රාත්‍රියේ දී නිකුත් කෙරුණු, අමාත්‍යංශ විෂයයන් සහ කාර්යයන් පැවරීමේ ගැසට් නිවේදනයට අනුව, ඔහුට, ඊළඟට, පහත සඳහන් ආයතන ද පවරා තිබේ;
අමාත්‍ය අඛිල විරාජ් යටතේ තිබු අධ්‍යාපන අමාත්‍යංශය ට අයත්;
1. පුරා විද්‍යා දෙපාර්තමේන්තුව.
2. මධ්‍යම සංස්කෘතික අරමුදල.
3. ටවර් හෝල් රඟහල පදනම.
4. ප්‍රසිද්ධ රැඟුම් පාලක මණ්ඩලය.
5. ජාතික ප්‍රසාංගික කලා මධ්‍යස්ථානය.
6. ජාතික කලා මණ්ඩලය.
7. ග්‍රාමෝදය ජන කලා කේන්ද්‍රය.
8. අපේ ගම.
9. ජාතික ලේඛණාරක්ෂක දෙපාර්තමේන්තුව.
අභ්‍යන්තර කටයුතු, වයඹ සංවර්ධන හා සංස්කෘතික කටයුතු අමාත්‍ය SB නාවින්න යටතේ තිබු;
10. සංස්කෘතික කටයුතු දෙපාර්තමේන්තුව.
11. ජාතික කෞතුකාගාර දෙපාර්තමේන්තුව.
සංවර්ධන උපාය මාර්ග හා ජාත්‍යන්තර වෙළෙඳ කටයුතු අමාත්‍ය මලික් සමරවික්‍රම යටතේ පැවති;
12. මහපොළ භාරකාර අරමුදල.
රාජ්‍ය පරිපාලන හා කළමනාකරණ අමාත්‍ය රංජිත් මද්දුම බණ්ඩාර ට අයත්ව තුබූ;
13. ජාතික චිත්‍රපට සංස්ථාව.
මේ අනුව, ජනාධිපති මෛත්‍රීපාල සිරිසේන, විජේදාස රාජපක්ෂ ට අදාළ අමාත්‍ය වගකීම් පවරන්නේ, අග්‍රාමාත්‍ය රනිල් වික්‍රමසිංහ ප්‍රමුඛ එජාප ප්‍රබලයන්ගේ ද අනු දැනුම ඇතිව බව අමුතුවෙන් කිවයුතු නොවේ. මේ තුන් පාර්ශවය අතර එවැනි එකඟතාවක් ඇතිවන්නේ කෙසේද? ඒ පදනම කුමක් විය හැකිද? ඊ ළඟට, ඔහු ජාතික ආණ්ඩුවෙන් බැස, නියම දේශප්‍රේමියෙකු ලෙස රාජපක්ෂ කඳවුර ට එන බව කියමින් විජේදාස වීරයෙක් බවට පත් කළ විමල් වීරවංශ ද ඇතුළු ඒකාබද්ධ කණ්ඩායම මේ සම්බන්ධයෙන් දැන් නිහඬ පිළිවෙතක් අනුගමනය කරන්නේ ඇයි? 
එය නිහඬ සම්මුතියක ප්‍රතිඵලයක් ද? එසේනම් සිදුවෙමින් පවතින්නේ කුමක් ද?
මේ තත්වය තවත් වෙනම පැත්තකින් ද විමසා බැලිය යුතුය!
2015 ජනවාරි 8, Regime Change මෙහෙයුම ට එකාබද්ධ වූ, චීන විරෝධී, ඉන්දියානු - ඇමරිකානු - NGOs ක්‍රියාන්විතය තුන් වසරකට ආසන්න කාලයක් ගෙවී යද්දී තම අරමුණු සෑහෙන ප්‍රමාණයක්; එනම් රාජ්‍ය, බෙදුම්වාදය කරා තල්ලු කරන ව්‍යුහාත්මක වෙනස්කම් මෙන්ම ආර්ථික ඝාතක ප්‍රතිසංස්කරණ ක්‍රියාදාම එකිනෙක ට බද්ධව සාර්ථක මට්ටමෙන් මෙතෙක් දුර පැමිණියේ, මෛත්‍රීපාල ප්‍රමුඛ විජේදාසලා ද ඇතුළත් සිංහල බෞද්ධ   ඊනියා ජනතා නියෝජිතයන්ගේ පුර්ණ දායකත්වය මතය. එහෙත්, කුමන හේතු මත හෝ රටේ ජනතාව ඒ ගමන තව දුරටත් ඉදිරියට යෑමට කිසිසේත් ම  ඉඩ නොදෙන බව, පසු ගිය පළාත් පාලන මැතිවරණ ප්‍රතිඵලයෙන් වටහා ගැනීමට, අදාළ දෙස් විදෙස් දේශපාලන මහ මොළ කරුවන් ට සිදු විය. එසේනම්, ජනතාව ගොනාට අන්දවා ඒ ගමන යෑම ට, ඔවුන් ට වෙනත් අලුත් උපක්‍රමයක් යොදා ගැනීමට සිදු වේ. ''විජේදාස භූමිකාව'' ක්‍රියාත්මක වන්නේ අන්න ඒ උපක්‍රමයේ එක් ඉදිරි පියවරක් ලෙස බව මම දැන් ඉතිහාසය වෙනුවෙන් මෙසේ සටහන් කර තබමි. එනම්, මේ,''උන් ව නසන්නට, උන්ගේ ම කෙනෙක් යොදා ගත යුතුය!'' යන, මෛත්‍රී තෝරා ගැනීම සඳහා ද යොදා ගනු ලැබූ  ඉපැරණි දේශපාලන උපක්‍රමය ම බව අවිවාදිතය.
අමාත්‍ය විජේදාස රාජපක්ෂ ඒ පැත්තෙන් ඉතාමත් ම දක්ෂයෙකි. පෙර කි සියලු තත්වයන් එසේ ම තිබියදී, ඔහු වෙනුවෙන් මියැදෙන්නට වුවත් සුදානම් ගිහි පැවිදි විශාල බෞද්ධ පිරිසක් රටේ සිටීමෙන් ම ඒ බව කෙනෙකුට වටහා ගැනීම අපහසු නොවේ. එකී ජනයා ට අනුව, වරෙක ඔහු රැඩිකල් ජනතා නියෝජිතයෙකි, උගතෙකි, අසාමාන්‍ය බුද්ධිමතෙකි, දුෂණ විරෝධියෙකි, රටේ ඒකීය භාවය වෙනුවෙන් සටන් කරන ජාතික වීරයෙකි. එය එසේ නම්, ඔවුන්ගෙන් ඇසිය යුතු ප්‍රශ්නය ඉතා සරලය. එවැනි ජාතික වීරයෙක් සිටින ආණ්ඩුවක් රට මේසා කණගාටුදායක විනාශයකට ඇදගෙන යමින් සිටින්නේ කෙසේද? ඊට එදිරිව, අධිකරණ අමාත්‍ය ධූරය ද ඇතුළු ආණ්ඩුවේ ප්‍රබල තැන් උසුලමින් ඔහු කළේ කුමක් ද? කිසිත් නැත! ඔහුත් එකී ඛේදවාචකයේ ම ප්‍රබල කොටසක් වූවා මිස! 
මේ, ෆීල්ඩ් මාර්ෂල් සරත් ෆොන්සේකා ගේ මැදිහත්වීමෙන් ජනගත වුණු දුෂිත ඉඩම් ගනු දෙනුව සහ ඊට සමගාමිව කරළිය ට ආ ඇවන්ගාර්ඩ් ගනුදෙනුව ඇතුළු, තවමත් නොවිසඳුණු තවත් වෙනත් කතාවලට අමතරවය. විශේෂත්වය වන්නේ මේ සියලු කතා මැද, සියලු පාර්ශව සමග එක්ව වැඩ කිරීමට ඔහුට ලැබෙන අසාමාන්‍ය අවස්ථාවයි. මෙය සාමාන්‍ය තත්වයක් විය හැකි ද? 
කොටින්ම, විජේදාස රාජපක්ෂ සාධකය මේ සියල්ලන්ටම ''නැතුව ම බැරුව'' තිබෙන්නේ ඇයි? ඔහු අසාමාන්‍ය දක්ෂයෙකු නිසා ද?
මේ ප්‍රශ්නය, ඔහු පිළිබඳ පුද්ගලික ප්‍රශ්නයක් නොව, ඔහු නිරූපානය කරන ලාංකේය දේශපාලනයේ ප්‍රශ්නයකි. ඊටත් වඩා, රටේ සිංහල බෞද්ධ ජන නියෝජනයේ විකෘතිය විදහා පාන සාධකයෙකි!
ඔව්! අපි බලා සිටිමු! රටේ උසස් අධ්‍යාපනය සහ සංස්කෘතිය සමඟ විජේදාස දේශපාලන සාධකය ගළප්පවන හැටි! 
රටේ නිදහස් අධ්‍යාපනය ට සහ සෞඛ්‍ය සේවාව ට මාරාන්තික බලපෑම් ඇති කරන SAITM අපරාධය සහ බෙදුම්වාදී උවමනාවන් වෙනුවෙන් පුරාවිද්‍යා භුමි විනාශකිරීමේ අපරාධ වැළ ඉදිරියේ විජේදාස සාධකය වැඩ කරන හැටි අපි එහෙනං දැන ට බලමු! 
CHAPA, May 14, 2018 

CHAPA at Schools! at Chandananda Buddhist School, kandy, May 15, 2018

CHAPA on ''fisheries and transport!'' on nidahas, May 16, 2018

INSIGHT EP 73 Anuradha Jayarathna

Friday, May 4, 2018

විද්‍යාත්මක කැබිනට් මණ්ඩලයක්!?

ජනාධිපති මෛත්‍රීපාල සිරිසේන මේ වෙනකොට විද්‍යාත්මක කැබිනට් මණ්ඩලයක් හදමින් ඉන්නවා ලු!
මුළින්ම කියන්නං මේ නං තවත් විහිළුවක්, ඒත් හිනා වෙන්න බැරි, මේ විහිළුවට ත්  රට වනසමින් මහජන මුදල් තොග පිටින් නාස්ති කරන නිසා. 
අපි අපේ සාකච්ඡාව මෙහෙම ආරම්භ කරමු!
කැබිනට් මණ්ඩලය හෙවත් අමාත්‍ය මණ්ඩලය ගැන 78 ආණ්ඩුක්‍රම ව්‍යවස්ථාවෙ හි සඳහන් වන්නේ මෙසේය;
VIII වැනි පරිච්ඡේදය
විධායකය
අමාත්‍ය මණ්ඩලය
අග්‍රාමාත්‍යවරයා සහ අමාත්‍ය මණ්ඩලය
42. (1) ජනරජයේ ආණ්ඩුවේ පාලනය මෙහෙයවීම සහ ඒ පාලනය පිළිබඳ විධානය භාර අමාත්‍ය මණ්ඩලයක් වන්නේය. 
      (2) අමාත්‍ය මණ්ඩලය පාර්ලිමේන්තුවට සාමුහිකව වගකීමට සහ පිළිතුරු බැඳීමට බැඳී සිටින්නේය. 
      (3) ජනාධිපතිවරයා අමාත්‍ය මණ්ඩලයේ සාමාජිකයෙක් ද අමාත්‍ය මණ්ඩලයේ ප්‍රධානයා ද වන්නේය. 
      (4) ජනාධිපතිවරයාගේ මතය අනුව පාර්ලිමේන්තුවේ විශ්වාසය උපරිම වශයෙන් ඇති පාර්ලිමේන්තු මන්ත්‍රීවරයා ජනාධිපතිවරයා විසින් අග්‍රාමාත්‍යවරයා ලෙස පත් කරනු ලැබිය යුත්තේය.
මේ අනුව කැබිනට් මණ්ඩලයේ කාර්යභාරය ඉතා පැහැදිලියි, එනම්, ජනාධිපති, අගමැති ප්‍රමුඛ අමාත්‍ය මණ්ඩලය රාජ්‍ය ප්‍රතිපත්ති සහ රටේ ඉදිරි ගාමන් මග පිළිබඳ අවශ්‍ය තීරණ ගනිමින් ව්‍යවස්ථාදායකය සමඟ සංවාදයක යෙදෙමින් රට පාලනය කිරීමයි. එය විද්‍යාවක්. ඒ නිසාම කැබිනට් මණ්ඩලය විද්‍යාත්මකව හදන්න දැන් කවුරු හරි කල්පනකරනවා කියන්නෙ ම ඔහු 'දේශපාලනය' විද්‍යාවක් බව දන්නෙ නැහැ කියන එක, 'විද්‍යාත්මක' කියන වචනය කොහෙන් හරි අල්ලගෙන තව නැටුමක් නටන්න හදන එක. 
මේ තිත්ත ඇත්ත වටහා ගන්න, 2017 ජුනි 15, දා වන විට ප්‍රකාශිත කැබිනට් මණ්ඩලය සහ ඒ ඒ විෂය පථයන් මොනවා ද යන්න අපි දැන් සොයා බලමු!
1. ආරක්ෂක, මහවැලි සංවර්ධන හා පාරිසරික, ජාතික සංකලන හා සංහිඳියාව - ජනාධිපති මෛත්‍රිපාල සිරිසේන.
2. ජාතික ප්‍රතිපත්ති සහ ආර්ථික කටයුතු - රනිල් වික්‍රමසිංහ.
3. සංචාරක සංවර්ධන, ක්‍රිස්තියානි ආගමික කටයුතු - ජෝන් අමරතුංග.
4. තිරසාර සංවර්ධන, වනජීවී - ගාමිණි ජයවික්‍රම පෙරේරා.
5. ප්‍රවාහන හා ගුවන් සේවා - නිමල් සිරිපාල ද සිල්වා.
6. මුදල් හා ජනමාධ්‍ය - මංගල සමරවීර.
7. සමාජ බල ගැන්වීම්, සුභ සාධන සහ කන්ද උඩරට උරුමය - SB දිසානායක.
8. කම්කරු, වෘත්තීය සමිති සම්බන්ධතා, සබරගමුව සංවර්ධන - WDJ සෙනෙවිරත්න.
9. උසස් අධ්‍යාපන, මහා මාර්ග - ලක්ෂමන් කිරිඇල්ල.
10. විශේෂ ව්‍යපෘති - සරත් අමුණුගම.
11. නගර සැලසුම්, ජල සැපයුම් - රවුෆ් හකීම්.
12. ආපදා කළමනාකරණ - අනුර ප්‍රියදර්ශන යාපා.
13. විද්‍යා, තාක්ෂණ හා පර්යේෂණ - සුසිල් ප්‍රේමජයන්ත.
14. සංවර්ධන ව්‍යපෘති - තිලක් මාරපන.
15. සෞඛ්‍ය, පෝෂණ හා දේශීය වෛද්‍ය - රාජිත සේනාරත්න.
16. විදේශ කටයුතු - රවී කරුණානායක.
17. වරාය හා නාවුක - මහින්ද සමරසිංහ.
18. ස්වදේශ කටයුතු - වජිර අබේවර්ධන.
19. අභ්‍යන්තර කටයුතු, වයඹ සංවර්ධන, සංස්කෘතික කටයුතු - SB නාවින්න.
20. කර්මාන්ත හා වාණිජ - රිෂාඩ් බදුර්දීන්.
21. මෙගා පොලිස්, බස්නාහිර සංවර්ධන - චම්පික රණවක.
22. ධීවර හා ජලජ සම්පත් සංවර්ධන - මහින්ද අමරවීර.
23. වැවිළි කර්මාන්ත - නවීන් දිසානායක.
24. විදුලි බල හා පුනර්ජනන බලශක්ති - රංජිත් සියඹලාපිටිය.
25. කෘෂිකර්මාන්ත - දුමින්ද දිසානායක.
26. වාරිමාර්ග, ජල සම්පත් කළමනාකරණ - විජිත් විජිතමුණි සොයිසා.
27. බුද්ධ ශාසන, අධිකරණ - විජයදාස රාජපක්ෂ.
28. ග්‍රාමීය ආර්ථික - P. හැරිසන්.
29. රාජ්‍ය ව්‍යවසාය සංවර්ධන - කබීර් හෂීම්.
30. මහජන පරිපාලන හා කළමනාකරණ - රංජිත් මද්දුම බණ්ඩාර.
31. ඉඩම් හා පාර්ලිමේන්තු ප්‍රතිසංස්කරණ - ගයන්ත කරුණාතිලක.
32. නිවාස හා ඉදිකිරීම් - සජිත් ප්‍රේමදාස.
33. ඛනිජ සම්පත් සංවර්ධන - අර්ජුන රණතුංග.
34. කඳුරට නව ගම්මාන, යටිතල සහ ප්‍රජා සංවර්ධන - U පලනි දිගම්බරම්.
35. කාන්තා හා ළමා කටයුතු - චන්ද්‍රානි බණ්ඩාර.
36. විදේශ සේවා - තලතා අතුකෝරළ.
37. අධ්‍යාපන - අඛිල විරාජ් කාරියවසම්.
38. තැපැල්, තැපැල් සේවා සහ මුස්ලිම් ආගමික කටයුතු - MHA හලීම්.
39. පළාත් සභා සහ පළාත් පාලන - ෆයිසර් මුස්තාෆා.
40. බන්ධනාගාර ප්‍රතිසංස්කරණ, පුනරුත්ථාපන, යළි පදිංචි කිරීම් සහ හින්දු ආගමික කටයුතු - DM ස්වාමිනාදන්.
41. නිපුණතා සංවර්ධන සහ වෘත්තීය පුහුණු - චන්දිම වීරක්කොඩි.
42. ක්‍රීඩා - දයාසිරි ජයසේකර.
43. නීතිය හා සාමය, දක්ෂිණ සංවර්ධන - සාගල රත්නායක.
44. සංනිවේදන සහ ඩිජිටල් යටිතල පහසුකම් - හරීන් ප්‍රනාන්දු.
45. ජාතික සංවාද සහ නිල භාෂා - මනෝ ගනේෂන්.
46. ප්‍රාථමික කර්මාන්ත - දයා ගමගේ.
47. සංවර්ධන උපායමාර්ග සහ ජාත්‍යන්තර වෙළෙඳාම - මලික් සමරවික්‍රම. 
48. ග්‍රාමීය සංවර්ධන - සරත් ෆොන්සේකා.
මේ තමයි එදා සම්පුර්ණ කෙරුණු අමාත්‍ය මණ්ඩලය! 
මේ සමහර අමාත්‍යංශ සහ අදාළ පත්කිරීම් දැන් යම් පමණකට වෙනස් වුව ද පොදු ආකෘතිය එසේමය. රටේ ආර්ථිකය මෙහෙයවීමට පමණක් අමාත්‍යංශ 9 ක්! මෛත්‍රීපාල සිරිසේන සහ රනිල් වික්‍රමසිංහ ප්‍රමුඛ අපේ පළපුරුදු දේශපාලන නියෝජිතයන් සිටින්නේ මොන තරම් මුග්ධ තැනකද යන්න ඔබට මේ අනුව සිතා ගත හැකි ද? දේශපාලනය, විද්‍යාවක් ලෙස නොව සිල්ලර කඩයක් කරන ගමේ දැනුමෙන් වත් තේරුම් ගැනීමට ඔවුන්ට නොහැකි වී තිබෙන බව ඉතිං අමුතුවෙන් තර්ක කර පෙන්වා දිය යුතු නැත.
මේ අමාත්‍යංශ සියල්ලම පාහේ පිහිටුවාගෙන ඇත්තේ මන්ත්‍රීවරුන්ට අල්ලස් ලබාදීම සඳහාය. අපේ රටේ මේ වනවිට මන්ත්‍රීකම වැඩක් නැති බවට මතයක් නිර්මාණය කොට තිබේ. ''මට ඇමතිකමක්වත් දුන්නෙ නැහැ!'' ''මට ලැබුණේ වැඩකට නැති ඇමතිකමක්!'' වැනි කතා ඇහෙන්නේ ඒ නිසාවෙනි. එනම්, අමාත්‍ය ධූර, අමාත්‍යංශ සහ විවිධ ජාවාරම් අතර ඍජු සම්බන්ධයක් නිර්මාණය වී තිබේ. හොඳ අමාත්‍යංශ යනු හොඳට මුදල් සොරා කෑ හැකි අමාත්‍යංශ බව මේ සියලු දෙනා එක්ව පෙන්වා දී තිබේ.
අපේ වැඩි අවධානයට ලක් නොවූ තවත් බරපතළ ප්‍රශ්නයක් ද මේ නරුම තත්ත්වයට ඈඳී තිබේ. එනම්, අමාත්‍යංශ සඳහා පුද්ගලික ගොඩනැගිලි කුලී පදනම මත ලබා ගැනීමේ ජාවාරමයි. ජයසිංහ - සබීතා පවුලේ රාජගිරි ගොඩනැගිල්ල ඊට ආසන්න හොඳම උදාහරණය පමණි. ඊට අමතරව මේ දේශපාලකයන් සහ ඔවුන්ගේ තැරව්කරුවන් ට අයත් විශාල ගොඩනැගිලි රාශියක් මිලියන ගණනින් කුලිය ට ගෙන තිබෙන බව තහවුරු වේ. 
මේ සියලු සිදුවීම් එකින් එක පෙළ ගැසෙන්නේ 1977 සිට ය. JR, ප්‍රේමදාස, DB, චන්ද්‍රිකා, මහින්ද, දැන් රනිල් - මෛත්‍රී! ඔවුන් සියලු දෙනා කරමින් සිටින්නේ මේ ක්‍රිඩාවමය. 
වඩා භායනක කාරණය වන්නේ, මොවුන් ට මේ ජාවාරම්කාර දේශපාලනය කර ගැනීමට, රට වට කර සිටින ආර්ථික ඝාතකයන් උපරිම සහය ලබා දීමය. එනම්, ඔවුන් ට සුපිරි ගොඩ නැගිලි, යාන වාහන කාර්ය මණ්ඩල, ආරක්ෂක කණ්ඩායම්, විදේශ ගමන් සමඟ උපරිම සැප ලබා දීමට අවශ්‍ය වට පිටාව සකස් කර, කෙටි කාලීනව සහ දිගු කාලීනව, රටේ ස්වභාවික සම්පත් කොල්ල කමින්, භූගෝලීය සුදුසුකම් වලින් උපරිම ප්‍රයෝජන ගනිමින් සහ තම වෙළෙඳ අරමුණු ව්‍යාප්ත කරමින් ඒ ආර්ථික ඝාතකයන් රිසි සේ තම දේශපාලන බලය පතුරුවති. අපි එට ප්‍රජාතත්‍රවාදය හෝ යහ පාලනය යැයි කියමු!
මේ සන්දර්භය තුළ, අද හෝ හෙට ජනාධිපති මෛත්‍රීපාල සිරිසේන රට ට හඳුන්වා දෙන විද්‍යාත්මක කැබිනට් මණ්ඩලය කුමක්ද යන්න අපි විමසා බලමු! එනම්, ඔහුට මේ පැවරී තිබෙන්නේ, ශ්‍රීලනිප - එජාප - ජවිපෙ - දෙමළ සන්ධානය - මුස්ලිම් කණ්ඩායම් එකට එකතු කොට, රනිල් වික්‍රමසිංහ අග්‍රාමාත්‍යවරයා ද කැටුව, රාජ්‍ය නොවන සංවිධාන ජාලයේද උදව් ඇතිව, තම ඉතිරි පාලන කාලය සම්පුර්ණ කරමින්, ආර්ථික ඝාතකයන් ප්‍රමුඛ ඊනියා ජාත්‍යන්තරයට අවශ්‍ය පරිදි රටේ පැවැත්ම තහවුරු කර දීමයි, ඔව්! අපි බලමු! ඔහුගේ විද්‍යාත්මක කැබිනට් මණ්ඩලය අද හෙටම දකින්න ලැබෙයි! 
CHAPA, May 1, 2018   
​ජවිපෙ, රට ට එරෙහිව?!


ජවිපෙ නායක අනුර කුමාර දිසානායක ට අනුව, ඔවුන් දැනටමත් විධායක ජනාධිපති ධූරය අහෝසි කරන 20 වැනි ව්‍යවස්ථා සංශෝධන යෝජනාව සකස් කරමින් සිටින අතර එය ඉතා  නුදුරේදී ම පාර්ලිමේන්තුව ට ඉදිරිපත් කිරීම ට නියමිතය. 
මේ සම්බන්ධයෙන් විවිධ පාර්ශවයන් හි විවිධ අදහස් ඉදිරිපත් වෙමින් තිබෙන අතර විවිධ පක්ෂ ඒ සඳහා ප්‍රතිචාර දක්වන ආකාරය ද පැහැදිලි කිරීම ට පටන් ගෙන තිබේ. ඒ අතර, ඊට සහයෝගය දීමට එකඟතාව පළ කර තිබෙන හිටපු ජනාධිපති මහින්ද රාජපක්ෂ ට ස්තුතිය පළ කිරීම ට ද ජවිපෙ නායකයා අමතක නොකළේය.
හිටපු ජනාධිපතිවරයා පුද්ගලිකව ඊට එකඟ වන්නේ, තමා ට යළිත් වතාවක් විධායක ජනාධිපති ධූරය ලබා ගැනීම ට නොහැකි බව දන්නා නිසා විය යුතුය. අනෙක් අතට, ඒකාබද්ධ විපක්ෂය තුළ ඊට වෙනස් මතයක් ද දැනට නැත. පොහොට්ටුව ට නායකත්වය දෙන බව කියන මහාචාර්ය GL පීරිස්, චන්ද්‍රිකා සහ වරෙක රනිල් සමඟ ප්‍රබල ලෙස පෙනී සිටියේ දෙමළ බෙදුම් වාදය වෙනුවෙන් ය. වාසුදේව නානායක්කාර ද වම දකුණ පටළවාගෙන ඊට සමාන තැනක සිටි බව රහසක් නොවේ. තම තමන් මතවාදීව වෙනස් වූ බව ඔවුන් කිසි විටෙකත් කියන්නේ ද නැත. ඒ අනුව රටේ ව්‍යවස්ථාව ට අදාළ යෝජිත විද්‍යාත්මක සංවාදය ඒකාබද්ධ විපක්ෂය තුළ කිසිදා ගොඩ නොනැඟෙන බව අවිවාදිතය. මේ ගැන ඔවුන් අනුගමනය කරන්නේ එදා වේල ට්‍රැවල්ස් ක්‍රමයකි.
රනිල් ප්‍රමුඛ එජාපය නං කොහොමත් මේ යෝජනාවට කැමතිය. ඒ හේතුව ද ඉතා සරල ය. රනිල් වික්‍රමසිංහ ට කිසිදා ඒ ධූරය ලබා ගැනීමට මහජනයා ඉඩ නොදෙන බව රනිල් මෙන්ම මුළු එජාපය ම දනී. වෙනත් ජනකාන්ත නායකයෙක් ද එහි දැනට නැත. හිටියත් රනිල් ඔහුට හෝ ඇයට ඉඩ දෙන්නේ ද නැත. ඔවුන්, රාජ්‍ය බලය ලබා ගැනීමට මරාගෙන මැරෙන්න වුවද සුදානම් ය. එහෙත්, ඒ රාජ්‍ය බලය කුමක් ද! යන්න ගැන කල්පනා කිරීමට උනන්දුවක් නැත. එය මුදල් හම්බ කරගත හැකි යමක් පමණක් බව ඔවුන් තේරුම් ගෙන සිටිනවා වැනිය. 
මෛත්‍රීපාල සිරිසේන ජනාධිපතිවරයා දෙවැනි වතාවට ත් විධායක ජනාධිපති ධුරයේ තබා ගැනීම ට සැලසුම් කරන ශ්‍රීලනිප කණ්ඩායමක් සහ පුද්ගලිකව ම මෛත්‍රී ද ජවිපෙ යෝජනාව ට විරුද්ධවීම ට යම් ඉඩක් තිබේ. එය ද තවත් දේශපාලන තත්වයන් කීපයකට සම්බන්ධ බැවින් තවම නිශ්චිත නැත. වෙනම ජාතිවාදී පාලන සිහින දකින දෙමළ ජාතික සන්ධානය සහ මුස්ලිම් කොංග්‍රසය කොහොමත් එක පයින් ජවිපෙ ට එකඟය. ලාංකේය රාජ්‍යයේ සියලු බිඳ වැටීම්, ඔවුන් ට කෙටි කාලීනව සහ දීර්ඝ කාලීනව වාසි සහගත බව, අත්දැකීම් බහුල ඔවුන් හොඳාකාරව දනී.
මේ වට පිටාව තුළ, 1978 ව්‍යවස්ථාව සහ එහි පදනම ලෙස සැලකිය යුතු විධායක ජනාධිපති ධූරය මෙරට පැවැත්මට බලපාන ආකාරය පිළිබඳ සංවාදය තවදුරටත් තීරණාත්මකය. ඒ අනුව, මේ, ශ්‍රී ලාංකේය ඒකීය රාජ්‍ය දුර්වල කොට තම වෙළෙඳ ආධිපත්‍ය පතුරුවා ගැනීම ට සහ ස්වභාවික සම්පත් කොල්ල කෑමට රට වට කර සිටින ඊනියා ජාත්‍යන්තරයේ සහ එහි මෙරට තැරව් කරුවන්ගේ අවසන් ඉලක්කය සපුරා දෙන කූට දේශපාලන ක්‍රියාදාමයේ අතිශය තීරණාත්මක ඉදිරි පියවරක් බව පැහැදිලි කර ගත යුතුය. 
අපි මෙහෙම බලමු! දැනට වලංගු 1978 ව්‍යවස්ථාව සහ රට මුහුණ දෙමින් තිබෙන සමස්ත දේශපාලන අර්බුදය අතර තර්කානුකුල සම්බන්ධයක් ඇති බවට ජවිපෙ ඇතුළු විවිධ කණ්ඩායම් පුන පුනා විග්‍රහ කිරීමට උත්සහ කළද, එහි කිසිදු විද්‍යාත්මක පදනමක් නැත. හොඳම උදාහරණය, වර්තමාන යහපාලනය ට අනුග්‍රහය දක්වන ඔවුන්ටම අනුව 2015 ජනවාරි 8 දා සිට මෙරට විධායක ජනාධිපති බලය ක්‍රියාවට නැංවී නැත, ජනාධිපති මෛත්‍රීපාල සිරිසේන, හිටපු ජනාධිපත් මහින්ද රාජපක්ෂ මෙන් රජෙක් නොව ජනතා සේවකයෙකි. ඉතිං, රටේ අර්බුදය දැන් අවසන් වී තිබේද? ගෙවී ගිය තුන් වසරකට අධික යහ පාලන කාලය තුළ සිදු වූ යම් හෝ යහපත් දේශපාලන වෙනසක් දැකිය හැකිද?
ඇත්ත වශයෙන්ම, මේ ව්‍යවස්ථාව හොඳ හෝ නරක බව තක්සේරු කිරීම ට නම් අප එය යම් කාලයක් සම්පුර්ණ වශයෙන් ක්‍රියාවට නැංවිය යුතුය. 1978 සිට බලයට පැමිණි කිසිදු ආණ්ඩුවක් එය එසේ කර නැත, තම තමන් ට අවශ්‍ය පරිදි එය යොදා ගත්ත මිසක! උදාහරණයක් ලෙස, ව්‍යවස්ථාපිත මූලික අයිතිවාසිකම් ක්‍රියාත්මක කිරීමට අවශ්‍ය වුයේ හෝ අවශ්‍ය වන්නේ මොන පාලකයන්ටද?! එසේම, මේ බොහෝ දෙනා කතා කරන ජාතික හෝ ජාතී - ආගම් අතර ප්‍රශ්න සඳහා කිසිදු ආකාරයකින් මෙම ව්‍යවස්ථාව හේතු වී නැති බව ද මෙහි සඳහන් කළ යුතුය. භාෂා සහ ආගම් පිළිබඳ ව්‍යවස්ථාමය වශයෙන් නිර්මාණය වී තිබෙන වර්තමාන තත්වය පවතින්නේ ඉතා හොඳ ප්‍රශස්ත මට්ටමකය. 
ව්‍යවස්ථාව ට පසුව එකතු වූ 13 වැනි සංශෝධනය ද ඇතුළත් ව රට ට හානි ගෙන දෙන තවත් අනවශ්‍ය සංශෝධන කීපයක් ම යෝජිත ව්‍යවස්ථාමය ගමන බාල කර තිබෙන බව ද අනාගත සාකච්ඡාවක් සඳහා මෙහි සටහන් කර තැබිය යුතුය. විධායක ජනාධිපති ධූරය පිළිබඳ සංවාදය ත් ගොඩ නැගිය යුත්තේ මෙන්න මේ දේශපාලන සන්දර්භය තුළ ය. අවශ්‍ය නම්, ඒ සංවාදය ධනවාදය, වෙළෙඳපොළ බලවේග, ප්‍රජාතන්ත්‍රවාදය සහ විද්‍යාත්මක සමාජවාදය ආදී වශයෙන් පුළුල් තලයකයකට ඔසවා තබා මහා ඓතිහාසික කාර්යභාරයකට උර දීමට ද පුළුවන. එහෙත්, එවැනි විද්‍යාත්මක දේශපාලන සංවාදයක සේයාවක් හෝ මේ මොහොතේ නං රට තුළ නැත. මේ ඉදිරියට යමින් තිබෙන්නේ කුමන්ත්‍රණකාරී සිදුවීම් පෙළක් පමණි.
ඊළඟට, රට තුළ මේ වනවිට ත් කැකෑරෙමින් පවතින මාරාන්තික ආර්ථික අර්බුදය විසඳා ගැනීමට මේ කිසිදු පාර්ශවයක් සුදානම් නැත. ලෝක බැංකුව සහ ජාත්‍යන්තර මුල්‍ය අරමුදල ඒකාබද්ධව පනවා තිබෙන ණය කොන්දේසි සමඟ මළ ගම් යන දේශීය ආර්ථිකය බෙර ගැනීම වෙනුවට ජවිපෙ ඇතුළු මේ පාර්ශව කරමින් සිටින්නේ කුමක් ද? මේ ඓතිහාසික දේශපාලන ඛේදවාචකය තුළ පවා තම තමන්ගේ පැවැත්ම තහවුරු කර ගැනීම පිලිබඳවය. 
කෙසේ වෙතත්, ජවිපෙ සැලසුම් කරන ආකාරයටම විධායක ජනාධිපති ධූරය අහෝසි වීමේ පැහැදිලි හැකියාවක් මේ අනුව පාර්ලිමේන්තුව තුළ නිර්මාණය වී තිබේ. සමස්තයක් ලෙස රට මුහුණ දෙමින් තිබෙන දේශපාලන තත්වයන් සමඟ සසඳන විට මෙය ඉතාමත් ම අනතුරුදායක තත්වයකි. 
මේ වනවිට, දෙමළ ඩයස්පෝරාව සහ ඊට සහය දෙන රාජ්‍ය නොවන සංවිධාන ජාලයක්, එක්සත් ජාතීන්ගේ සහ යුරෝපා සංගමයේ පුර්ණ ආශීර්වාදය සහිතව ශ්‍රී ලාංකේය රාජ්‍ය, බෙදුම්වාදී ආකෘතියකට මාරු කිරීම සඳහා ඉතා සංවිධානාත්මක ක්‍රියාන්විතයක් දියත් කරමින් සිටින බව අමුතුවෙන් විස්තර කළ යුතු නැත. එහි මූලික වැඩ කටයුතු සැලකිය යුතු ප්‍රමාණයක් දැන් පවතින්නේ ක්‍රියාත්මක තලයේය. ලාල් විජේනායක වාර්තාව හරහා නිර්මාණය කර තිබෙන එකී බෙදුම්වාදී ගෝත්‍රික දේශපාලන දැක්ම, දීර්ඝකාලීනව, වික්ටර් අයිවන්ගේ ''පුනරුද ව්‍යාපාරය'' වැනි සමාජ ක්‍රියාකාරකම් හරහා සමාජගත කරමින් තිබේ. ඊට සමගාමීව රාජ්‍ය නොවන සංවිධාන රැසක් විවිධ වේශයන්ගෙන් ඊට සම්බන්ධ වී තිබෙනු පෙනේ. යෝජිත බෙදුම්වදී ව්‍යවස්ථාව සඳහා මුළු පාර්ලිමේන්තුව ම ව්‍යවස්ථා සම්පාදක මණ්ඩලයක් බවට පත් කොට තිබෙන අතර එහි ''අනු කමිටු'' විසින් සකස් කළ බව කියන වාර්තා හය සමඟ අදාළ  ක්‍රියාදාමය දැන් එහි අවසන් අදියර දක්වා රැගෙනවිත් තිබේ. 
පසු ගිය දා සම්මත කර ක්‍රියාවට නැංවූ, පළාත් පාලන මැතිවරණ සංශෝධනය මගින් භුමියේ පරිපාලන සීමාවන් තීරණය කොට, නව ව්‍යවස්ථාවෙන් යෝජිත ග්‍රාම රාජ්‍ය ආකෘතිය දක්වා පළාත් පාලන යාන්ත්‍රණ විහිදුවන ආකාරය, ඒ අතර ස්ථාපිත කර තිබේ.
ශ්‍රී ලංකාව ඒකීය රටක් නොවන බව ත්, 1978 ව්‍යවස්ථාවේ දැන් තිබෙන Unitary State යනු ''ඒකීය රාජ්‍ය'' නොවන බවත්, ඊට වඩා යෝග්‍ය ''නොබෙදුණු රාජ්‍ය'' යන යෙදුම බවත්, ජනාධිපතිවරයා ප්‍රමුඛ බොහෝ දෙනා දැන් ප්‍රසිද්ධියේ ප්‍රකාශ කරමින් සිටින පසු බිමක යෝජිත බෙදුම්වාදී ව්‍යවස්ථාව සම්මත කර ගැනීම තව දුරටත් අපහසු කටයුත්තක් නොවේ.
ඊළඟට තිබෙන එකම බාධාව වන්නේ විධායක ජනාධිපති ධූරයයි. ශ්‍රී ලංකේය ඒකීය රාජ්‍ය සහ විධායක ජනාධිපති ධූරය එකිනෙක ට බද්ධව තිබෙන ආකාරය, ව්‍යවස්ථාව පරිශීලනය කරන ඕනෑම කෙනෙකුට පැහැදිලි විය යුතුය. ජවිපෙ මේ සුදානම් වන්නේ අන්න ඒ බැඳීම ළිහා දැමීමට ය. කොටින්ම, ඉහත සඳහන් කළ පරිදි, තම තමන්ගේ පටු උවමනාවන් වෙනුවෙන්, මහින්ද, රනිල් ( මෛත්‍රී ඇතැම් විට ) ප්‍රමුඛ සිංහල නායකයන් සහ ජාතිවාදී අරමුණු වෙනුවෙන් දෙමළ මුස්ලිම් නායකයන් මේ ක්‍රියාන්විතයට සම්බන්ධ වෙද්දී, ඊනියා ජාත්‍යන්තරය ට සහ ඉන්දියානු - චීන කළාපීය දේශපාලනය ට අවශ්‍ය, ශ්‍රී ලංකේය රාජ්‍ය දුර්වල කොට යටත් කර ගැනීමේ ව්‍යාපෘතිය ඉතා සාර්ථකව සම්පුර්ණ වේ.
ඒ අනුව, විධායක ජනාධිපති ධූරය අහෝසි කිරීමේ ජවිපෙ යෝජනාව කෙසේ හෝ පරාජය කළ යුතුය, ඒ සඳහා තම තමන්ගේ දේශපාලන නියෝජිතයන් තෙරපීමේ වගකීම ඇත්තේ මහජනතාවටය! 
ඔව්! ඒ සඳහා පෙළ ගැහෙන්න! 
CHAPA, April 25, 2018

CHAPA against Milk Powder! on nidahas, May 5, 2018

INSIGHT EP 71 ASHOKA PRIYANTHA