Monday, December 17, 2018


...another true story!

මට ඒ ඉවසිම එපා!



''මහත්තයා...මං මේ අලුත් වැඩ පිළිවෙළක් ගැන කල්පනා කරනවා...''
ජංගම දුරකතනය දිගේ උදෙන් ම උන්වහන්සෙගෙ කට හඬ, පුංචි කාලයෙ ගමේ පංසලේදි හිතේ රැඳුණු අර ලොකු හාමුදුරුවන්ගෙ කරුණාවන්ත කට හඬමයි. දැන් මාස කීපයක ඉඳන් වන්නිය පැත්තෙ පංසලකින් මේ හාමුදුරුවො වරින් වර කතා කරනවා. රට ගොඩ ගන්න හැටි තමයි කතා කරන්නෙ.
''මේ අපේ රට...අපෙ ඇස් පනා පිට විනාශ වෙන්න දෙන්න බෑ!''
''එහෙමයි අපෙ හාමුදුරුවනේ...''
''මහත්තයො, එන්න එන්න රටේ තත්ත්වය වෙනස් වෙනවා, රට යන්නෙම වලපල්ලට...නේද මහත්තයො?''
''ඒක තමයි හාමුදුරුවනේ...අපි මොනවා හරි කරන්න ඕන, ඒත් මිනිස්සු ඒ ඒ පක්ෂ එක්ක බැඳිලා...වහල්ලු වගේ, මොකුත් ම කරන්න බැහැ...''
''අන්න ඒකයි අපෙ මහත්තයෝ...මං මේ අලුත් වැඩ පිළිවෙළක් ගැන හිතුවෙ, දැන් මෙයාලා හදන්නෙ, විධායක ජනාධිපති ධූරය අහෝසි කරන්නනෙ, නේද? අපි මේ අවස්ථාවෙ උපායශීලි වෙන්න ඕන...''
''ඒ කියන්නෙ?''
''අපි හදන්න ඕන, ඕන කෙනෙකුට ජනාධිපති වෙන්න පුළුවන් විදිහක්...මහත්තයාට තේරුණාද?''
'' මට නං තේරෙන්නෙ නැහැ හාමුදුරුවනේ...''
''අපි නෙට් එකක් හදනවා ඕන කෙනෙකුට ඒ සඳහා ඉදිරිපත් වෙන්න පුළුවන් විදිහට...''
''නෙට් එකක්?''
''ඔව්, අපෙ මහත්තයෝ...නෙට් එකක්, අපි ඊට පස්සෙ SMS මාර්ගයෙනුත් නාම යෝජනා බාර ගන්නවා...''
''හාමුදුරුවො මේ උදේ පාන්දර විහිළුවක් එහෙම කරනවා නෙවෙයි නේද?''
''නෑ මහත්තයෝ, මං මේ හුඟාක් කල්පනා කරලා තමයි කතා කරන්නෙ, අපි අවස්ථාව හදන්න ඕන, ඕන කෙනෙකුට විධායක ජනාධිපති වෙන්න පුළුවන් විදිහක්...''
''අනේ හාමුදුරුවනේ, තරහා වෙන්න එපා මෙහෙම කිව්වට, ඕක මහා පිස්සු අදහසක්, ඔබ වහන්සේ දැනට තියෙන ආණ්ඩුක්‍රම ව්‍යවස්ථාව එහෙම යම් දුරකට හරි අධ්‍යනය කරල තියෙනවද? මං මේ නිකමට අහන්නෙ...''
මං අහන්න දෙයක් නැතුව වගෙ ඔහේ අහනවා.
''ඒවා ඕන එකක් ඔහේ තිබිච්ච දෙන් මහත්තයා, අපි අපේ වැඩේ කරමු...''
''ඔබ වහන්සේ කවුරු හරි නොමග යවනවා, ඔය නෙට් එක හදන්නෙ කොහොමද කියන්නකො...''
මගේ හඬ දැන් ටිකක් වෙනස් වෙනවා.
''අන්න ඒ ගැන තමයි මං මේ කියන්න හදන්නෙ, දැන් ඔය තියෙන ඉන්ටර්නෙට් එහෙම එක එක සමාගම් කාරයින්ගෙනෙ...අපි වෙනම නෙට් එකක් හදනවා...''
''වෙන අන්තර්ජාලයක්?''
''ඔව් මහත්තයා...උවමනාව තියෙනවා නං මොනවද කරන්න බැරි?''
''අපෙ හමුදුරුවනේ...මේ කතා අහනකොට මට නිකං විකාරයි වගෙ...''
''එහෙම වෙන්න එපා මහත්තයො...අර එදා දෙරණ වැඩ සටහනේදි විශ්වවිද්‍යාල මහාචාර්‍ය දේවසිරි මහත්තය කියපු දේවල් උනත් ඔයිට වඩා ඉවසීමෙන් අහන්න තිබුණා අපෙ මහත්තයා...මං මේ තරහට කියනවා නෙවෙයි...අපි එකතු වෙලා මේ නෙට් එක හදමු මහත්තයා, මං කියනවට...''
''හාමුදුරුවනේ, මාත් මේ කියන්නෙ කේන්තියකයට නෙවෙයි, ඔබ වහන්සේ කියන්නෙ මොකද්ද කියල ඔබ වහන්සෙම දන්නෙ නෑ! මට හිතෙන්නෙ, ඔබ වහන්සෙගෙ හිත හොඳ කම නිසා කවුරු හරි ඔබ වහන්සේ නොමග යවනවා...මේ වෙලාවෙ නෙට් දාලා සිංහල බෞද්ධ ඡන්ද කොල්ල කන්න වගේම ඒ ජන සමාජය විනාශ කරන්න ලොකු ප්ලෑනක් යනවා, මට පේන්නෙ ඔබ වහන්සේත් එහෙම නෙට් එකකට අහු වෙලා වගෙ..කෝකටත් පරිස්සමෙන් අපෙ හාමුදුරුවනේ...''
''එහෙම නෙවෙයි මහත්තයො...මේ වැඩ වලට ඉවසීම ඕන..බුදුහාමුදුරුවොත් දේශනාකරලා තියෙන්නෙ...''
''මට ඒ ඉවසීම එපා!''
මං එහෙම කිව්වෙ නැහැ, ඒත් උන්වහන්සේට කතා කරන්න නොදී කෝල් එක කට් කෙරුවා. ආයෙ ගත්තොත් උත්තර දෙන්නෙම නෑ!
CHAPA
Dec 18, 2018

ගෙවිඳු! මරාගෙන මැරෙන්න නං එපා!

හිතවත් ගෙවිඳු,
මේ කෙටි සටහන තියන්න හිතුවෙ, ඔබ අර මාධ්‍ය හමුවක් පවත්වමින් නටන පිස්සුව ගැන කියන්න ම නෙවෙයි. ඒ මාධ්‍ය වාර්තාකරුවා ඔබ කුපිත කරවමින් අහන ප්‍රශ්නය වෙන විදිහකට අහන්නත් පුළුවන් කියන්න. ඔහු වෙන වචන වලින් අහන්නෙ, මහින්ද රාජපක්ෂ මේ වෙලාවෙ අග්‍රාමාත්‍ය තනතුර භාර ගත්තෙ මොකද කියලා. ඔබ කියනවා රට බේර ගන්න කියලා. කොච්චර කිව්වත් ඒකම අහන නිසා ඔන්න ඔබට කේන්ති යනවා. ඒකනෙ වෙන්නෙ.
අපි මෙහෙම බලමු!
2015 Regime Change එකේ ප්‍රධාන ඉත්තා ජනාධිපති මෛත්‍රී, ඔච්චර පුංචි අහිංසක බබෙක් කියලා ඔබට හිතෙනවද? 19 වැනි ව්‍යවස්ථා සංශෝධනයේ සිට, ව්‍යවස්ථා කුමන්ත්‍රණය හරහා හානිපූර්ණ පනත දක්වා ශ්‍රී ලාංකේය රාජ්‍ය, විනාශය කරා ඇදගෙන යන්න, එය යළි දෙමළ බෙදුම්වාදය වෙනුවෙන් පූජාකරන්න මූලිකත්වය දෙන ජනාධිපත් මෛත්‍රී එකපාරට ම වෙනස් වුණා?
අනේ නිකං ඉන්න ගෙවිඳු!
2016, 2017, 2018 අය වැය යෝජනා හරහා ඊනියා සාර්ව ආර්ථිකයක් ක්‍රියාවට නංවමින් රටේ සුභ සාධන රාජ්‍ය ආකෘතිය තව දුරටත් විනාශ කරමින්, රාජ්‍ය දේපොළ සහ ස්වාභාවික සම්පත් විකුණමින්‍ රට අගාධයට දක්වන්න මූලිකත්වය දීපු ජනධිපති මෛත්‍රී එකපාරට ම වෙනස් වුණා?
අනේ මේ! ගෙවිඳු…
චීනය ට හම්බන්තොට වරාය පැවරුවා! කෝ මෛත්‍රී? ඔහු චීනයට විරුද්ධව මෝඩි කබායත් ඇඳගෙන, වරාය නගරයෙ – සංනිවේදන කුළුණෙ වැඩ බොරුවට නවත්තලා පස්සෙ ඒ පිදේනි චීනෙටම දුන්නෙ නැද්ද? මත්තල ගුවන් තොටුපොළ, පළාලි ගුවන් තොටුපොළ, ත්‍රීමළේ තෙල් ටැංකි ඉන්දියාවට! කොළඹ වරායෙ නැගෙනහිර පර්‍යන්තය නං බැරි ලු, බටහිර ද මන්දා වෙන දිශාවකින් නං ඉන්දියාවට දෙන්නං ලු!
ඔබට මේවා තේරෙන්නෙම නැද්ද?
මෙතන යන්නෙ ගේමක්! එක්කෝ, මෛත්‍රී – රනිල් ව්‍යාපෘතිය ට මහජන විරෝධයක් පැන නැගුණු නිසා, විශේෂයෙන් ම පහුගිය පළාත් පාලන මැතිවරණයෙන්; ඒ මහජන කේන්ද්‍රය විදිහට තියෙන මහින්ද සාධකය අරගෙන ගේමෙ ඉතුරු ටික ප්ලේ කරන්න හදනවා. සමහර විට අර නාමල් කුමාර කියන බූතයා කියන විදිහට ඒ සාධකය සහ එහි අනුප්‍රාප්තික සාධක භෞතිකව විනාශ කරන්න හදලා එය කලින් පත්තු වුණා වෙන්නත් පුළුවන්.
ඔය ඔක්කොම මැද්දෙ ඔබෙන් අහන්න තියෙන මූලික ප්‍රශ්නය ඉතා බැරෑරුම්.
ගෙවිඳු! ඔබේ ඔය කියන සිංහල බෞද්ධ ජාතිකත්වයේ පදනම මොකද්ද?
ඒකීය රට වෙනුවෙන් දෙමළ බෙදුම්වාදය ට විරුද්ධ ඔබේ හඬ පැහැදිලියි. මුස්ලිම් ව්‍යප්තවාදය ගැනත් ඔබේ ස්ථාවරය පැහදිලියි. රටේ ඉතිහාසය ගැන ඔබ පෙන්වා දෙන කරුණු ත් පැහැදිලියි.
ඒත් රට ඉන්දියානුකරණය සහ චීනකරණය කිරීම ගැන ඔබේ විරෝධයක් නැහැ. ලෝක බැංකුව සහ ජාත්‍යන්තර මූල්‍ය අරමුදල රටේ අර්ථිකය ට කරමින් තියෙන විනාශය ඔබ ට අදාළ නැහැ. ඒ ආර්ථික ඝාතනය ඔබ ට දනෙන්නෙ නැහැ.
ඔබ දන්නවාද!? මේ ජාතිය මෙහෙමවත් රැකිලා තියෙන්නෙ නිදහස් අධ්‍යාපනය සහ සෞඛ්‍ය සේවාව නිසා. ඔය දෙතුන් පැත්තෙම නසරානියො ඒ සුභසාධනවාදී රාජ්‍ය තත්ත්වය විනාශ කරන්න හදන හැටි ඔබ ට පේන්නෙම නැහැ, ගෙවිඳු!
මට මතකයි, නන්දිකඩාල් කළපුව හරහා ඔබේ කඳවුර ට ආපු හමුදා නායකයා – කමල් ගුණරත්න ඕස්‍ට්‍රේලියාවෙ රැස්වීමකදි දෙමළ බෙදුම්වාදය ට විරුද්ධව කෑ ගහමින් අහනවා, මේ රටේ ලොකු ම ප්‍රශ්නය SAITM ද කියලා! ඔබටත් ඔය කොටස අහු වෙන්නෙ නැහැ.
සියල්ල විකුණන, සියල්ල විකිණෙන රටක ඉතුරුවන ජාතිකත්වයක් නැහැ! අන්න ඒ ඓතිහාසික සංදර්භය තුළ, මහින්ද මේ ඉස්සරහාට එන්නෙ මොකාගෙන් මොකක් බේර ගන්නද කියලා, අර ඔබ අකමැති ප්‍රශ්නය වෙන ම තලයකදි මතු කරන්නත් පුළුවං!
ඔබ ට එකක් කියන්නං, ගෙවිඳු!
සියළු පක්ශ අභිබවා යන මහා ජාතික ව්‍යාපාරයක් අත්‍යවශ්‍ය මොහොතක, ඔබ වගෙ අය මොකක් හරි ජාතික කෑල්ලක් අරගෙන නටන ඔය නැටුම ඉක්මනටම ඉවර වෙනවා. ඒ ඔබත් ඉවර වෙලා රට ත් ඉවර වෙලා! හරියට වම්මුන්ට සහ වම ට වුණා වගෙ. මේ ගමනාන්තය නං ඊට වඩා භයානකයි මිත්‍රයා! මොකද “ජාතික” අවකාශය “වම්” අවකාශය ට වඩා තීරණාත්මකයි!
මහාචාර්‍ය චන්න ජයසුමනටත් මේ වග කියන්න!
CHAPA
Dec 9, 2018

රෙද්දෙ ණය!


මේ දවස්වල ඇහෙන ප්‍රවෘත්ති අතර විදේශ ණය ලබා ගැනීමට නොහැකි වන ආකාරයේ “මහා අනතුරක්” ළඟ එන බව සාකච්ඡාවට ගැනෙනවා. ජාත්‍යන්තර (?) ඒජන්සියකින් දෙකකින්, ණය ශ්‍රේණිගත කිරීම් කරලා ශ්‍රී ලංකාව ඒ ලැයිස්තුවේ හිටපු තැනින් තව පහළට වැටිලා, විදේශ ණය ලබා දීම ප්‍රතික්ෂේපිත තැනකටම තල්ලු වෙමින් තියෙනවා කියන එක තමයි කතාව.
ඉතිං හොඳනෙ!
දශක ගණනාවක්, විශේෂයෙන් ම 80 දශකයෙන් පස්සෙ, හිටපු, ඉන්න පාලකයො කෙළවරක් නැතුව හතර වටෙන් ණය අරගෙන ඒවත් හොරකං කරමින් පවුල් පිටින් සැප විඳපු නිසා, අපි රටක් හැටියට මහා භයානක ණය උගුළක හිර වෙලා මේ ඉන්නෙ. මේ ආර්ථික ඛේදවාචකය ට නිලධාරී තන්ත්‍රයත් කෙළින්ම වග කියන්න ඕන.
නිකං හිතන්න, රටක විගණකාධිපතිවරයෙක් කියනකොට ” මේ රට අරගෙන තියෙන ණය ගැන හරි විස්තරයක් සක්‍රයාගෙ පුතා වයිමා ආවත් කියන්න බෑ! කියලා, අපි මොන තරම් භයානක තැනකද මේ වෙනකොට ඉන්නෙ? 
ඔය ශ්‍රේණිගත කිරීම් මොන රෙද්දවල්ද?! 
ඔය උන් කියන්නෙ, තොපි අපි කියන විදිහට නටන්නෙ නැත්තං අපි තොපිට ණය දෙන්නෙ නෑ! කියලා. වැඩේ කියන්නෙ, ණය ට පිස්සු කෙළිමින් ෆන් ගන්න පුරුදු වෙච්ච මහ එවුන් දැන් බයේ කුං කුං ගානවා. සාමාන්‍ය මහ ජනතාවට නං ඔය එකක්වත් වැඩක් නැහැ. ඔය මොකක් හරි පැත්තකට සෙට් වෙලා ණය ට කැහැ කැහැ ඉන්නවා.
රටක් ණය ගන්න ඕනද? කෙනෙක් අහනවා නං, ඔව්! අත්‍යවශ්‍ය ව්‍යාපෘතියක් සම්පූර්ණ කරන්න හෝ එවැන්නක් අළුතෙන් පටන් ගන්න, නිශ්චිත සැලැස්මකට යටත්ව. වැදගත් ම දේ, ණය පොළියටත් වැඩිය – ණය කොන්දේසි‍ර්! අපේ රට වගේ, මෝඩ පාලකයන්, වෘත්තිකයන් සහ නිලධාරීන් ඉන්න රටවල් ඔය ණය ගන්නෙ, ජාත්‍යන්තර මූල්‍ය අරමුදලෙන් හෝ ලෝක බැංකුවෙන්, තම රට උන් ට උකස් කරලා. චීනයත් දැන් ලෝකය පුරා ඔය ණය ක්‍රීඩාව කැතටම කරනවා. මහින්ද පාලන කාලය තුළ සහ දැනටත් ඒ චීන ණය ආක්‍රමණය බරපතළ විදිහට ක්‍රියාත්මකයි. ඊට අමතරව ලෝකයේ විවිධ රටවල කළු කඩ ණය වෙනම.
මේ විදිහට, ණය උගුල්වලට හසුව, ආසියානු, අප්‍රිකානු සහ ලතින් ඇමරිකානු රටවල් සෑහෙන ප්‍රමණයක් දැනටමත් පණ අදිනවා.
ඔබ සමහර විට හිතනවා ඇති ඔය ගත්ත ණය ගෙවලා දැම්මට පස්සෙ කතාව ඉවරනෙ කියලා. නැහැ! ඒ ණය, විශේෂයෙන් ම මේ ශ්‍රේණිගත කිරීම ට අදාළව සම්බන්ධ ජාත්‍යන්තර මූල්‍ය අරමුදලට සහ ලෝක බැංකුව ට. ආසියානු සංවර්ධන බැංකුවටත් සම්බන්ධයි. ඒ ණය අපට දීලා තියෙන්නෙ සහ තව දුරටත් දෙන්නෙ, රටේ ආර්ථිකය මෙහෙයවන බලය තම අතට අරගෙන. එහිදී ඔවුන් රටේ ආර්ථික ප්‍රථිසංස්කරණ උපදෙස් දෙනවා. මහ බැංකුව තම අරමුණු කරා තල්ලු කරගෙන යනවා. ඒ අනුව තමයි රටේ අය – වැය හදලා සම්මත කර ගන්න ඕන. පාර්ලිමේන්තුවේ ඉන්න රූකඩ 225 සරං උස්සගෙන කලිසං සාරි ගලෝගෙන කරන්නෙ ඔච්චරයි.
ඒ අනුව, මේ වන විට මහ බැංකුව මුදලාලිකරණය කිරීම, මූල්‍ය පාලනය දඩාවතේ යැවීම, බදු පිට බදු ගැහීම, රාජ්‍ය ව්‍යවසායන් PPP ක්‍රමයට විකිණීම, රාජ්‍ය සුභ සාධනය කප්පාදු කරමින් විශේෂයෙන් ම නිදහස් අධ්‍යාපනය සහ සෞඛ්‍ය සේවාව කප්පාදු කරමින් මුදලාලිලාට භාර දීම, විදේශීය තැරැව් කරුවන් ට රටේ ස්වාභාවික සම්පත් කොල්ල කන්න අවශ්‍ය පසුබිම සකස් කිරීම සහ ඒ සියල්ලට අවශ්‍ය සංස්කෘථික සංහාර මෙහෙයුම් දියත් කිරීම ඉතා සංවිධානාත්මකව සිද්ධ වෙනවා.
මතක තියා ගන්න! මේ ණය ඒජන්සි කෙළින් ම එක්සත් ජාතීන් ට සහ බහු ජාතික සමාගම් ජාලයකට සම්බන්ධයි. එතකොට, රටේ රාජ්‍ය බෙදුම්වාදී ආකෘතියකට මාරු කරන්න අවශ්‍ය ව්‍යවස්ථා කුමන්ත්‍රණය ඉස්සරහට යන්නෙත් මේ ණය ක්‍රීඩාව ට සමගාමීව.
මීට අමතරව, චීන ණය සහ සූක්ෂම ආයෝජන මෙන්ම තවත් කළු කඩ ණය උගුල් වෙනම තියෙනවා. අන්න ඒ නිසා තමයි, සක්‍රයාගෙ පුතා වයිමාටවත් යමක් හරියට කියා ගන්න බැරි!
අපට ණය එපා!
1. ගත්තු ණය ගැන විධිමත් විමර්ශනයක් කරපල්ලා.
2. ඒ ණය කොන්දේසි සමාලෝචනය කොට රට ට හානි වන කොටස් ඉවත් කරපල්ලා.
3. තව ණය ගැනිල්ල වහාම නවත්තපල්ලා.
4. රාජ්‍ය නාස්තිය, හොරකම, දූෂණ වංචා නවත්තපල්ලා.
5. රට ට ගැළපෙන ආර්ථික සැලැස්මක් හදපල්ලා.
6. රටේ නිෂ්පාදන අර්‍ර්ථිකය ගොඩ නගපල්ලා.
7. ආහාර නිෂ්පාදනය වේගවත් කොට ආහාර සඳහා පිට රට ට ඇදී යන අති විශාල මුදල ඉතුරු කරපල්ලා. 
8. දේශීය වෛද්‍ය විද්‍යාව සංවර්ධනය කොට බටහිර වෛද්‍ය වෙළෙඳ පොළ සහ ඖෂධ මාෆියාව පාලනය කරපල්ලා.
එතකොට අපට විදේශ ණය ඕන නැහැ!
ඔය පාර්ලිමේන්තුවේ ඉන්න සරං කලිසං සාරි ඇඳ ගත්තු කොල – නිල්- රතු – තවත් පාට අම්බරුවන් ට මේ කියන්නෙ!
වටේ ඉන්න නිලධරී රොත්තත් එක්ක මොකක් හරි කරපල්ලා, ණය ගන්න බැරි වෙයි, සාර්ව ආර්ථික සැලසුම් ඉවරයි! කිය කියා තප්පුලන්නෙ නැතුව!
CHAPA, Dec 7, 2018්

රහස කුමක්ද?


රාජ්‍ය නොවන සංවිධාන සහ ඒවායේ විවිධ තැරැව් කරුවන් මෙන්ම විදේශ තානාපතිවරු “සෙට්” එකක් පාර්ලිමේන්තුව සහ අධිකරණය වටළා තිබෙන ආකාරයෙන් ම, මේ රට මුහුණ පා තිබෙන බරපතළ දේශපාලන අනතුර වටහා ගන්න කෙනෙකුට පහසුවෙන් ම පුළුවන්.
2015 ජනවාරි 8 Regime Change ව්‍යාපෘතිය ට එහා යන මේ ව්‍යාපෘතිය නිවැරදිව කියවා ගන්න තවම අමාරුයි.
අපි මෙහෙම බලමු;
හිටපු අග්‍රාමාත්‍ය රනිල් වික්‍රමසිංහ ගේ දේශපාලනය, ජනාධිපති මෛත්‍රීපාල සිරිසේන දැන් විග්‍රහ කරන විදිහ නිවැරදියි නේද කියලා කෙනෙකුට හිතෙන්න පූළුවන්. “අනේ! අපේ අතිගරු ජනාධිපතිතුමා අන්තිම මොහොතෙ හරි රට බේරා ගත්තා!” කියලත් කෙනෙක් කියන්න පුළුවන්. ප්‍රශ්නය සරලයි! 2015 ජනවාරි 8 Regime Change ව්‍යාපෘතිය භාර ගත්තෙ එහෙම නං වෙන මෛත්‍රී කෙනෙක් ද? ඊ ළග ප්‍රශ්නය ත් ඉතා සරලයි. එතැන් සිට රනිල් ට ඕන ඕන දේ කරන්න දීලා, කළ ගුණ සැලකුවා කියන මෛත්‍රී බබෙක් ද?
මගේ යෝජනාව පැහැදිලියි! මෛත්‍රී මේ ගහන්නෙත් ගේමක්.
එක දිගට කියමින් ඉන්න දේ ආපිට කියන්නං. 
ඊනියා ජාත්‍යන්තරයෙ, මෛත්‍රී + රනිල් ව්‍යාපෘතිය තව දුරටත් ඉස්සරහට ගෙනියන්න දෙන්නෙ නැහැ කියලා රටේ වැඩි පිරිසක්, කාගෙ ලකුණක් යටතෙ හරි, පහු ගිය පළාත් පාලන මැතිවරණයේදි එක හඬින් කියා හිටියා. ඒ ව්‍යාපෘතියෙ මහ මොළ කාරයො ඒ පණිවිඩයෙන් ගැස්සුණා. එහෙම නං කරන්න වැඩ දෙකක් ඔවුන් සැලසුම් කරනවා;
1. එකී ව්‍යාපෘතිය ට එරෙහිව මහජනයා ඒකරාශී වන රාජපක්ෂ කඳවුරේ ප්‍රධානීන් භෞතිකව ඉවත් කරනවා. කඳවුර බිඳ දානවා.
2. උපක්‍රමශීලීව, රනිල් දුෂ්ටයා බවට පත් කරමින්, පෙර සඳහන් ජන පදනම තමන්ට නතු කර ගන්නවා.
1 හෝ 2 ක්‍රම මගින් වෙන් වෙන්ව හෝ ඒ දෙකෙහි ඒකාබද්ධ වැඩක් හැටියට යෝජිත “දේශපාලන ගේම” සාර්ථක කර ගන්නවා.
නාමල් කුමාර, ඒ අනුව ඇටිකිච්චෙක් නෙවෙයි, “RAW තෝමස්” පිස්සෙකුත් නෙවෙයි.
මේ සම්පූර්ණ සැලැස්ම ගැන තවම හරියට කියවාගන්න බැහැ. සමහර විට අපට කවදාවත්ම එය දැන ගන්නත් බැරි වෙයි. කොහොම වුණත් මේ අළුත් ව්‍යාපෘතිය ට ඉන්දියාව, චීනය, එක්සත් ජාතීන් – යුරෝපා සංගම් NGO කාරයන් වගේම දෙමළ ඩයස්පෝරාවත් සෘජුව – වක්‍රව සම්බන්ධයි.
මේ සියල්ල පිටුපස තිබෙන දේශපාලන උවමනාව කුමක්ද?
1. ශ්‍රී ලාංකේය ඒකීය රාජ්‍ය බිඳ දමා රාජ්‍ය දුර්වල කිරීම සහ ඒ සඳහා දෙමළ – මුස්ලිම් පටු බෙදුම්වාදී – ව්‍යප්තවාදී උවමනාවන් යොදා ගැනීම.
2. ඊනියා ආර්ථික ප්‍රතිසංස්කරණ හරහා, 1. ටත් අදාළ ව, රාජ්‍ය දිය කරමින් එහි ව්‍යවසායන් සියල්ල මුදලාලිකරණය කිරීම, බහු ජාතික සමාගම් ග්‍රහණය තව දැඩි කර ගැනීම, රටේ ස්වභාවික සම්පත් සහාසිකව කොල්ල කෑම.
3. ඉන්දීය – චීන කළාපීය සහ ලෝක වෙළෙඳ යුද්ධය ට ශ්‍රී ලාංකේය භූමිය සහ මුහුද අවශ්‍ය පරිදි සූදානම් කිරීම.
මේ සංකීර්ණ සහ බරපතළ දේශපාලනය වටහා ගැනීමට අපොහොසත් එජාප, ශ්‍රිලනිප, ජවිපෙ සහ අනෙක් සිංහල බහුතර නියෝජනයක් ඇති පක්ශ, මෝඩ කමේ ප්‍රමෝදය අත් විඳිමින් තම තමන්ගේ පටු බල ව්‍යාපෘති තුළ ම තොල කට ලෙවකමින් සිටින බව දැන් පැහැදිලිව දැකිය ගැකිය.
අන්ත ආත්මාර්ථකාමී දෙමළ නායකයන් තම නූගත් ජනයා ජාතිවාදී හැඟීම්වලින් හිරිවට්ටා තම පැවැත්ම සහතික කර ගනිද්දී, මුස්ලිම් අන්තවාදීන් ඉතා සූක්ෂමව තම ව්‍යප්තවාදය පළල් කර ගනිද්දී, රටේ අති බහුතරය වූ සිංහල ජනයා පාට පක්ෂ ආගම් බවට පත් කර ගනිමින් මාරාන්‍තික සතුටක් ලබන හැටි!
දැන් මම ඔබට මෙහෙම කියනවා!
මෛත්‍රී යොදාගෙන පටන් ගත් මේ දේශපාලන ක්‍රීඩාවේ කෙළවර ගැන සමහර විට මෛත්‍රීත් දන්නෙ නැතුව ඇති. එක්කෝ ඒ “රහස” ඔහු දන්නවාත් ඇති.
“පොඩ්ඩක් ඉවසලා ඉමු සම්බන්ධන් මහත්තයා, අපි කාගෙ කාගෙත් වැඩ ටික ඒ විදිහට කෙරෙයි!”
මෛත්‍රී, සම්බන්ධන් ට කියන්නෙ නං එහෙම රහසක් වෙන්නත් පුළුවන්!
CHAPA 
Dec 6, 2018

සියතින් බෙල්ල මිරිකාගෙන මැරෙන්න වෑයම් කරන ලෝකයේ එකම “රාජ්‍ය” ශ්‍රී ලංකාව!

මේ වන විට, ශ්‍රී ලංකා රාජ්‍ය ගෙවා දමමින් තිබෙන්නේ, ලෝක ඉතිහාසයේ ම ඉතා අසීරු මොහොතක්!
ලෝකයේ සියළු ප්‍රබල රටවල් වරෙක තම දෑත් වලින් ම සූත්‍රගත කළ “ගෝලීයකරණ” මුසාව මග හරිමින් – තම තමන්ගේ “ජාතික රාජ්‍යයන්” ශක්තිමත් කොට, තම වෙළෙඳ ආධිපත්‍ය ලොව පුරා විහිදුවමින් වැඩෙද්දී, ඒ පිළ දකුණු ඉවුර බවට පත් කළ වම් ඉවුරේ සියළු රටවල් ද තම තමන්ගේ “ජාතික රාජ්‍යයන්” තර කර ගනිද්දී, ශ්‍රී ලාංකාව රාජ්‍යයක් ලෙස සිය අත් වලින් ම තම බෙල්ල මිරිකාගෙන සිය දිවි නසා ගැනීමට ලහි ලහියේ ක්‍රියාත්මක වන අවිචාරවත් මොහොතක් මේ!
ඒ සමඟ නිල්, කොල, රතු සහ තවත් පාට ගාගත් ගොන් තක්කඩි රැළක් දැන් මළබෙරය වයමින් එයින් උත්කර්ෂයට පත්ව සිටිනවා. ඒ අස්සේ එසේ මරා දැමෙන රටින් මොකක් හරි වාසියක් ගන්න බලන් ඉන්න ව්‍යාපරික රොත්තක්.ඒ සියල්ලට අර්ථකථන ලබා දෙන අමන වෘත්තික රංචුවක්, සියළු දෙනාම පාහේ ඉතිං ප්‍රමෝදයෙන්!
මේ අනුව, ශ්‍රී ලාංකික අපි දකුණ හෝ වම නොදන්නා ගොබ්බ රැළක් බවට පත් වෙමින් සිටින්නෙමු!
කතාව කෙටියෙන් මේකයි!
මහා යුද ඉතිහාසය එක කඩ ඉමකට රැගෙන ආ මානව ශිෂ්ටාචාරය, 18 වැනි සියවස පමණ වන විට “ජාතික රාජ්‍ය” ගොඩ නහමින් ලෝකයට වෙනස් හැඩයක් ලබා දුන්නා. ඒත්, ඊ ළග මොහොතේ මහා යුද්ධ මැද ඒවා එකිනෙක ගැටී යළි මහා යුද පිටියක් නිර්මාණය වෙනවා, එය 20 වැනි සියවස මැද හරිය වන විට, තීරණාත්මකව පුපුරා යනවා.
ඒ අතර, ඒ යුද ඉතිහාස සටහන් මැද ම ගොඩ නැගෙන වම් ඉවුරේ සහ එහි ප්‍රතිවිරුද්ධ අන්තයේ වූ දකුණු ඉවුරේ කඳවුරු තර කෙරෙනවා. ලොව පුරා, ඔවුන් නිසාම දුර්වල වුණු සෙසු රටවල්, ශ්‍රි ලංකාවත් ඇතුළුව ඒ කඳවුරු ද්විත්වයේ ගොදුරු බවට පත් වෙනවා.
එජාප, ශ්‍රිලනිප මෙන්ම දෙමළ – මුස්ලිම් පක්ශ සියල්ල ඒ ධනවාදී කඳවුරේ මෝඩ ඒජන්තවරු බවට පත් වන විට ජවිපෙ දක්වා වන රතු පින්තාරු කර ගත් සියළු කණ්ඩායම් වම – දකුණ පටළවාගත් කොන්ත්‍රාත්කරුවන් බවට පත් වෙනවා. අර ලෝක දේශපාලනයේ තැරව් කරුවන් වන NGO කාරයන්, ඒ අතර රටේ සක්‍රීය පුර වැසියන් බවට පත් වෙනවා.
මේ තමයි සියතින් බෙල්ල මිරිකාගෙන මිය යන්න වෙර දරන ලෝකයේ එකම රාජ්‍යය!
වැඩේ කියන්නෙ, මේකෙ ඉන්න එවුන් හිතාගෙන ඉන්නෙ “ශ්‍රී ලංකා රාජ්‍ය” කියන්නෙ මෛත්‍රී, මහින්ද, රනිල්, අනුර…ඔන්න ඔය වගෙ කවුරු
හරි කියලා!
CHAPA, Dec 4, 2018

දීප්ති කුමාර ගුණරත්නට ලියමි

ලංකාවේ බහුතරයක් ජනයා ගමන් කරන්නේ වෘත්තයක් දිගේය. ඒ නිසා ඔවුන්ට වරක් වූ දෙය යළිත් සිදු වෙයි. වරක් දුටු දෙය යළිත් පෙනෙයි. එවිට ඔවුන් විශ්මයට පත් වෙයි. අසූව දශකය මුල සංවර්ධනයේ සංකේතය ලෙස ඔවුන්ට මහවැලි ව්‍යාපාරය හමුවූ අතර ඊට වසර 30 කට පසුව යළිත් එයම අධිවේග මාර්ග යනුවෙන් හමු වී ඇත.

1988 වසරේදී රොහාන් පෙරේරාට ‘යාත්‍රා’ නම් සගරාවක් සහ ‘දීප්ති’ නම් පුද්ගලයෙක් හමු වූ අතර 2013 වර්ෂයේදී යළිත් ඔහුටම ‘පැපරාසියා’ නම් සගරාවක් සහ ‘සේපාල්’ නම් පුද්ගලයෙකු හමු වී ඇත.

වෘත්තයක ගමන් කරමින් ධනවාදය විශ්ලේෂණය කරන අයෙකුට අනුව ලෝකය දෙකට බෙදෙයි. (1) ධනවාදී සමාජය – මුදල් රජ කරන ලෝකය (2) මුදල් රජකරන ධනවාදී ලෝකය ඇතුළේ ජීවත්වන පුද්ගලයා.

මෙම දෙකට බෙදුණු ලෝකය නිසා ආචරණ දෙකක් බිහි වී ඇත.

(1) ධනවාදය ගැන වාස්තවික අදහසකට යාම

(2) පුද්ගලයා ගැන වාස්තවික අදහසකට යාම.

මෙම ආචරණ දෙක අතර බිහිවන නිරන්තර ‘පරතරය’ ඉතිහාසයේ මේ දක්වා විසඳී නැත. ධනවාදය ගැන කරන ඕනෑම විශ්ලේෂණයකට පොදු මෙම ප්‍රවණතාවය නිසා බිහි වී ඇත්තේ අපූර්ව ආකාරයේ විරුද්ධාභාසයකි. මෙම විරුද්ධාභාසය රොහාන් පෙරේරා පැපරාසියා 2013 – සැප්තැම්බර් කලාපයේදී විශ්ලේෂණය කරන්නේ පහත පරිදිය.

”දැං අපි එක්තරා අනුභූතියක් ස්ථානගත කරමු. ආණ්ඩුවත් එක්ක ජනතා විරෝධී ව්‍යාපෘති ගොන්නකට මහ බැංකුව හරහා දායක වන ගමන් අශෝක හඳගම ‘මේ මගේ සඳයි’, ‘අක්ෂරය’ වගේ චිත‍්‍රපටි කිරීම ගැන කවුරුවත් ප්‍රශ්න කළේ නැහැ. එතැන ස්වාභාවික තර්කය වන්නේ, අරක හඳගමගේ රස්සාව, මේක එයාගේ සමාජ වැඩ යනුවෙනි. මේ ස්වාභාවික තර්කය කුමාර චාපා බණ්ඩාරට අදාළ නොවන්නේ කෙසේද? (චාපාගේ දෙබිඩි ජීවිතය සේපාල් ප්‍රශ්න කිරීම ගැටලූව ආරම්භ කරයි. එහි නිධාන කතාව සැකෙවින් මෙසේය. වෙජිටේරියන් කෙනෙක් වුණු චාපා කොහොමද මැක්සීස් කියන කුකුළු ඝාතක ව්‍යාපාරය එක්ක එකතු වෙලා සමාජ සංවර්ධන වැඩ කරන්නේ? ගැටලූව වන්නේ මේ දෙකම එක පුද්ගලයෙක් කිරීමේ උභතෝකෝටිකයයි – සටහන මගේ)”

ඉහත ‘පැපරාසියා’ සගරාවේම 20 වන පිටුවේ සගරාවට එවන ලද ලිපියක් කිසිඳු සංස්කරණයකින් තොරව පහත පරිදි පළ කර ඇත.

”දීප්ති අද දවසේ කරන්නේ කුමක්ද? දීප්තිගේ වර්තමාන තේරීම ද ඇත්තේ තරු පන්ති දේශපාලනයයි. විවිධ කණ්ඩායම් ආමන්ත‍්‍රණය කරමින් ඔවුන්ව දැනුම්වත්කොට ක්‍රියාකාරී කරනවාට වඩා දීප්ති වර්තමානයේ තෝරාගෙන ඇති ක්‍රමය ඔහුගේ ශරීරයට සැපදායී බවට සැක නැත. අතීතයේදී දීප්ති කුමාර ගුණරත්න අන් අය තමන් වටා කරකවා ගත්තේය. ඒ වෙනුවට අද දීප්තිගේ ලෝකය කැරකැවෙන්නේ අනාගත එ.ජා.ප. ආණ්ඩුවක ජාතික ලැයිස්තු මන්ත‍්‍රීධුරයක සුභ සිහිනයක් දකිමින් සිටින සුදර්ශන ගුණවර්ධන වටාය. සුදර්ශනගේ ලෝකය කැරකැවෙන්නේ රනිල් වික්‍රමසිංහ වටාය. (න්‍යායික කවටකමක් කරන්නේ නම් අද දවසේ දීප්තිගේ සංකේත පියා සුදර්ශනය, සීයා රනිල්ය.)සුදර්ශන වෙනුවෙන් කුලියට ලිවීම, කතා පැවැත්වීම පිළිබඳව දීප්තිට කීමට ඇත්තේ කුමක්ද?”
– ඉසුරු රංගනාත් කරුණාතිලක –
(මෙම නම බොහෝවිට අන්වර්ථ නාමයකි.)

අපට කියන්නට ඇත්තේ කුමක්ද? යථාර්ථය විශ්ලේෂණය කිරීමට ක්‍රම දෙකක් ඇත.

(1) යථාර්ථය සහ අදහස් සම්පාත වෙයි.[REALITY= IDEA]

(2) යථාර්ථය යනු අදහස්වලට සම්පාත නොවී ඊට විරුද්ධව ඉතිරි වන ශේෂය ‘සැබෑව’ (REAL) ලෙස ගැනීම.

ඉසුරුගේ අදහස්වලට අනුව දීප්තිගේ සහ සුදර්ශනගේ අභිප‍්‍රායන් ටක්කෙටම දනියි. නමුත් සේපාල්ගේ ‘පැපරාසියා’ සගරාවට මුදල් දෙන්නේ කවුද? ඒ ඇයි? යන ප‍්‍රශ්න ඔහු අසන්නේ නැත. රොහාන් පෙරේරා ‘අශෝක හඳගම’ ගැන අහන ප‍්‍රශ්නය ඔහු සේපාල් උදෙසා නොඅසයි. හඳගමගේ සමාජ භාවිතය කෙතරම් දෙබිඩිද එතරම්ම සේපාල්ගේ භාවිතාවත් දෙබිඩිය. ‘යථාර්ථය’ පිළිබඳ ලෙනින් වැනි විප්ලවවාදියෙක් හැම විටම අහන්නේ මෙම මූලික ප‍්‍රශ්නයයි. ඔහුගෙන් ප‍්‍රජාතන්ත‍්‍රවාදය, නිදහස ගැන ඇසූ විට පෙරළා ඔහු අසන්නේ මෙවැන්නකි, ‘කාටද? මොකටද?’. ඉසුරු රංගනාත් සහ රොහාන් පෙරේරා අනුන්ගෙන් අහන ප‍්‍රශ්න තමන්ගෙන්ම නොඅසන්නේ ඇයි? යථාර්ථය ඇතුළත අපිරිසිදු වී අනෙක් මිනිසුන් සිටිත්දී, නෙළුම් මල් මෙන් මඩ නොගෑවුණු මේ මිනිසුන්ගේ පැවැත්ම ඇත්තේ ධනවාදයෙන් පිටත අකනිටා බඹ ලොවද? නැත. මේ අය ද ජීවත් වන්නේ මේ කුණු වලෙහි මඩ නාගෙන අසූචි බුදිමින් බව නොදන්නේ සමාජ විචාරය ගැන A,B,C නොදන්නා තොත්ත බබාලාය.

ඉහත දී ඉසුරු කරුණාතිලකත් ඇතුළුව සමහරුන් නිරීක්ෂණය (අනුභූතිකව) කරන පරිදි මගේ ආර්ථිකය ගැන ඔවුන්ගේ නිගමන අයිති වන්නේ ‘සැබෑවට’ නොව ‘ෆැන්ටසීන්’වලටය. සාමාන්‍ය මිනිසුන් සමාජයේ ජනපි‍්‍රය චරිත දෙස බලා තමන් නොලබන පරිසමාප්ත විනෝදයක් ඔවුන් විඳිතැයි උපකල්පනය කිරීම අහම්බයක් නොවේ. එය ආත්මීය අවශ්‍යතාවයකි. මෙය වාමාංශික දේශපාලන ව්‍යාපාරයට එන විට සමීකරණය මෙලෙස වෙනස් වෙයි. ‘මට විඳින්නට තිබූ පරිසමාප්ත විනෝදයක් ඔහු මගෙන් හොරකම් කර ඇත. නැතහොත් මට විඳින්නට ඇති පරිසමාප්ත විනෝදයකට ඔහු බාධා කරමින් සිටියි.’

සතුටු වන්න! [ENJOY LIFE] යන නියෝගය සහිත සමාජයකදී සුපිරි-අහම (SUPER EGO) විසින් යෝජනා කරන්නේ චෝදනා කළ හැකි සතුරකු බාහිරින් සොයා ගන්නා ලෙසයි. එය රාජකාරිය වැනි උතුම් කැපකිරීමකි. ලංකාවේ ජීවත්වන ඕනෑම වාමාංශික නායකයෙකුට වඩා මගේ ආර්ථිකය ඇත්තේ පහළින්ය. නමුත් මට මගේ දුර්වල තැන ගොදුරක් ලෙස වේශ නිරූපණය කර හිගා කන්නට අවශ්‍ය නැත. මට අවශ්‍ය මිනිසුන් මගේ ශක්තිමත් තැන වූ ‘චින්තනය’ සමග ගැටීමයි. වෙළඳපොළ ආර්ථිකයට සහ පරිභෝජනවාදී සංස්කෘතියට මගේ ඇති බැඳීම යනු ද ෆැන්ටසියක් මිස සැබෑව නොවේ. මගේ ආදායමෙන් මෙම පාරිභෝගික සංස්කෘතිකය තුළ කළ හැක්කේ මාජරීන් සහ MD ජෑම් මිලට ගැනීමත් උදේට සම්බෝල සමග පතෝල සහිත බත් වේලක් කෑමය. මුදල් හදල් සහිත මගේ මිතුරන් සමග බොහෝ දෙනෙකුට මාව පැටලීයාම මගේ වරදක් නොවේ. විටින් විට මෙවැනි ආකාරයේ මිතුරෙකු අක‍්‍රමවත්ව ලබා දෙන ආධාර මුදල් නැත්නම් මගේ ආර්ථිකය කම්මුතුවී බොහෝ කල්ය.

බොහෝ දෙනෙකුට කට උත්තර නැතිවී වැරදිකාර දෘෂ්ටියක හිරවෙන ඉහත අභියෝගය අපි දැන් න්‍යායික විශ්ලේෂණයකට භාජනය කරමු.

මාගේ වර්තමාන න්‍යායික අවබෝධයට අනුව පුද්ගලයා සහ සමාජය ලෙස දෙකට බෙදූ සමාජය විශ්ලේෂණය කිරීම දෘෂ්ටිවාදී වැඩ බිමකි. මෙය මාගේ අදහසක් නොව මාක්ස්වාදී දර්ශනයේ මූලධර්මයකි. (කෞට්ස්කි ද්‍රෝහියා කියා ලෙනින් කියන විට ඉන් අදහස් වන්නේ කෞට්ස්කිගේ දෙබිඩිබවක් නොව ඔහු දෘෂ්ටිවාදයට සම්බන්ධ තැනයි) මාක්ස්වාදයට අනුව පුද්ගලයා සහ සමාජය ලෙස දෙකට බෙදා (මෙහි උපරිම දාර්ශනික වර්ධනය වන්නේ සහසම්බන්ධ ප‍්‍රතිපක්ෂය – හොඳ/නරක, ව්‍යවහාරය/න්‍යාය, ද්‍රව්‍යය/අදහස්, උසස්/පහත්, පක්ෂ මතය/අපගමණය) කරන විග‍්‍රහයන් අවසන් වන්නේ විනෝද වන අනෙකෙකු පිළිබඳ ෆැන්ටසි සාගරයකින්ය. (දෘෂ්ටිවාදය යනු ගැටුම්, භේද, පසමිතුරුභාවයන් නැති සුසංවාදී සමාජයක් වෙතට අපව රැගෙන යන ආත්මීයත්වය සමග බද්ධ වූ සමාජයීය අදහස්ය.)

සමස්තය පොළවක් ලෙස සලකා එය පුද්ගලයා සහ සමාජය ලෙස දෙකට කඩා විශ්ලේෂණය කිරීම සීතල යුද්ධ යුගයේ හට ගත් බුර්ෂුවා සමාජ-විද්‍යාවේ මූලික අංගයකි. ජාතික රාජ්‍යයන් තුළ ජීවත් වන පුද්ගලයන්ගේ ජාතික අනන්‍යතාවයන් අර්බුදයට යාම, අධිරාජ්‍යවාදය නැගගෙන ඒම සහ පන්ති ව්‍යුහයත් එම ව්‍යුහයන්ගේ වටිනාකම් පද්ධතිය අභාවයට යාමත් යන කරුණු නිසා සීතල යුද්ධයේ ආරම්භය සමග සමාජ-විද්‍යාවට අලූත් මානයක් බිහිවිය. නූතන ධනවාදී සමාජ ක‍්‍රමය ඇතුළත එක පැත්තකින් වඩ වඩා පරමාණුකරණය (හුදෙකලා වන) වන පුද්ගලයෙකු සිටින අතර අනෙක් පසින් වඩ වඩා නිශ්ශබ්ද වන ‘මහජනතාවක්’ බිහි වෙයි. බුර්ෂුවා සමාජ-විද්‍යාවේ ක‍්‍රමවේදය වන්නේ මේ පැති දෙකටම පොදු වූ ආකෘතික ලක්ෂණ (FORMAL) මගින් සමාජය විචාරය කිරීමයි. හනා අරෙන්ඞ්, විල්හෙල්ම් රයික්, එරික් ෆ්‍රෝම් වැනි සමාජ විචාරකයන්ගේ රචනා මගින් ප‍්‍රකට වන්නේ මෙම දෙබිඩි සමාජ-විද්‍යාවේ ආකෘතික ලක්ෂණයි. මෙම සමාජ-විද්‍යාවේ ඉතාම අන්තගාමී නිගමනයන්ට අනුව ‘සමාජවාදය’ සහ ‘ෆැසිස්ට්වාදය’ යනු පරිපූර්ණ සමාජයක් වෙතට යන විට හමු වන සිහින ආකෘති දෙකකි. මෙම සිතීමේ ක‍්‍රමයට අනුව සමාජවාදයත්් ෆැසිස්ට්වාදයත් යනු එකම කාසියේ දෙපැත්තයි. එනම් සර්වාධිකාරයයි (TOTALITARIANISM). කුමුදු කුසුම් වැනි තනි අලියෙකු සහ රහසිගත සිංහල ජාතිවාදියෙකු උත්සාහ කරන්නේ අපගේ ධනවාදී විරෝධය සර්වාධිකාරියකින් අවසන් වන බව පෙන්වීමටය.

2004 වර්ෂයේ මුල සිට එම වර්ෂයේ අග දක්වා මා වෙත යොමු කළ නිර්නාමික ලිපි විශේෂයක් අපගේ සංවිධානයට ලැබෙන්නට පටන් ගත්තේය. එම ලිපිවල අන්තර්ගතය ඉසුරු රංගනාත්ගේ ලිපිවල අන්තර්ගතයට ඉතා සමීපය. එම ලිපිවල තර්ක පමණක් වෙනස්ය. 2004 දී ලැබුණු ලිපිවලට අනුව මා කතා කළ සියල්ල වැරදිය, මා ඒකාධිපතිය, මගේ අවසානය අත ළගය. මේ ලිපි එවූ පේ‍්‍රමනීය ජෝඩුව පසුව විවාහ වී දරු සුරතල් බලමින් දැන් ඇමරිකාවේ ජීවත් වෙයි. වර්තමාන ලිපිවලදී මා කළ සාධනීය දායකත්වය පිළිගනියි. ගැටලූව වන්නේ එවන් සාධනීය වැඩක් සුදර්ශනලා[දැන් මේ නම වෙනස් විය යුතුය] වැනි පිරිස් මගින් අපවිත‍්‍ර කර ගන්නේ ඇයිද යන්නය. මේ අය බලා සිටින්නේ මහා-අනෙකාගේ අවසරය සහ භක්තියට යටත්වී විප්ලවයක් කිරීමටය. ලෙනින් එතැනදී වෙනස්ය. ‘විප්ලවය දැන් කරමු’ යැයි කී විට කෲප්ස්කයා ඇතුළු අනෙක් සහෝදරවරු කීවේ පිස්සුද කියාය. ලංකාවේ කී දෙනෙකුට පිස්සුදැයි මම නොදනිමි.

දීප්ති කුමාර ගුණරත්න

2013
………………………………………………………………………………………………………………………………………………………………………..
දීප්ති කුමාර ගුණරත්න, 2013 දී ලියා ඇති මෙම ලියැවිල්ල මම අද අහම්බයකින් කියවන්නෙමි. මෙහි මා ගැනත් සඳහන් වන බැවින් දීප්ති ට ප්‍රතිචාර දැක්විය යුතු යැයි කල්පනා කරමි. එය ඉතා ඉක්මනින් ඔබට මෙහි කමෙන්ටුවක් ලෙස කියවා ගන්නට සලස්වමි! CHAPA
Comment – දීප්තිලාට අවශ්‍ය කුමක්ද?
දීප්ති කුමාර ගුණරත්න, මේ ලියැවිල්ලට යොදා ඇති “වෘත්තයක චලනය වන්නා විචාරය කිරීම” යන තේමාව ම ඕන නං ඔහුටත් අදාළව, එනම් “දීප්තිලා” හිර වී සිටින “විද්වත් උගුල” තේරුම් ගැනීමට, කෙනෙකුට යොදා ගන්න පුළුවන්.
ඔබ දැන් වෘත්තයක් මොහොතකට මවා ගන්න! එය පිළිගත් සම්මතයට අනුව, කේන්ද්‍රයක් වටා සම දුරකින් ඇඳෙන රේඛාවක්. දීප්ති ඉතා දුර්වල මට්ටමෙන් ගොනු කරන්න හදන, ඔහුගේ අනෙකා ට එදිරි තර්කය, එනම් “යළි යළි සිදුවීම හෝ යළි යළි හමු වීම” මේ ගණිතමය රූපකයෙන් නිරූපණය වෙන්නෙ නැහැ. ඔහුට ඒ සඳහා තෝරා ගත යුතුව තිබුණේ, අඩුම තරමේ “චක්‍රය” වැනි සංඛේතයක්. දීප්තිලාගෙ මේ මූලික අවුල ඔවුන් ට හොරා ඔප්පු කර පෙන්වන්නෙ, ඔවුන් තම තමන් වටා ළකුණු කර ගත්ත වෘත්තයක සීමාවේ අසිරිය විඳිමින් එහි කේන්ද්‍ර බවට පත්ව, ඒ තුළ සිරවී “දැනුම් ඛේදවාචක” බවට පත්වීම බව මම යෝජනා කරනවා.
ඔවුන් හසු වී සිටින ඒ මාරන්තික උගුලේ ඉතාම දුක්බර තත්ත්වය වන්නේ, “ලංකාවේ බහුතරයක් ජනයා” ලෙස, ඔවුන් ලෝක දේශපාලනය සහ ඒ ඒ ඓතිහාසික තත්ත්වයන් හකුළුවා, තමා ම සැඟවූ යමක් සොයන්නන් බවට පත් ව සිටීමයි. ලෝකයේ. වෙන රටවල් මාරයි! අන්න මිනිස්සු! යැයි මනෝමය විකාරක එතී තම රට පිළිබඳ වැරදි තක්සේරුවක් ගන්නා ඊනියා බුද්ධිමතුන්ගේ ලැයිස්තුවට දීප්ති මෙන්ම ඔහු උපුටා දක්වන්නන් ද, ඔන්න එතකොට ඇතුළු කරන්න සිද්ධ වෙනවා.
පොදු ප්‍රශ්නය ඉතා සරලයි.
ඔවුන් ට අවශ්‍ය කුමක් ද?
දීප්ති මේ ලියැවිල්ල පුරාම විවිධ පුද්ගලයන් සහ සිදුවීම් එකිනෙක ගළපන විදිහ හිස් වෑයමක් බවට පත්වෙන්නෙ ඔන්න ඔය සන්දර්භය තුළ. ඕන නං ඊළගට අපි දීප්තිගෙ ලියැවිල්ලෙ ඒ ඒ ඡේද වෙන වෙන ම සාකච්ඡාවට ගම්මු!
දැනට ඔහු, රොහාන් – සේපාල් හරහා මා ගැන ඉදිරිපත් කරන පදනම් විරහිත කියවීම ගැන අවධානය යොමු කරමු!
දේශපාලන ක්‍රියාකාරිකයෙක් සහ ජනමාධ්‍යකරුවෙකු ලෙස 1998 සිට නොනවතින දේශපාලන අරගලයක යෙදෙන මම ජීවිතය ම දේශපාලන වැඩ බිමක් බවට පෙරළා ගන්නවා. විවිධ මිනිස්සු, විවිධ අවස්ථා, විවිධ සිදුවීම්! අවසන් ඉලක්කය සහ භාවිතය එකක් ම වන, ගමනාන්තයක් නැති ගමනක්.
මස් මාළු බඩ ජහරි කමට බුදිමින් අදාළ කර්මාන්ත වලට ගරහන ජඩයන්ගෙන් අගතියට පත්වන සමාජ තීරුවක් ඒ අතර මට අභිමුඛ වෙනවා. වෙන්නප්පුවේ මැක්සීස් සහ තොඩුවාව කේන්ද්‍රකොටගත් මහා වැඩ බිම ගොඩ නැගෙන්නෙ එහෙමයි. මාංශ නිෂ්පාදකයන් සහ ධීවරයන් සමඟ 2011 – 2015 අතර කාලය ගෙවෙන්නෙ එහෙමයි. මස් මාළු කන්නෙ නැති මගේ පුද්ගලිකත්වය ඒ අරගලයට වැඩි ශක්තියක් වූවා මිස ඊට හරස් වූයේ නැත. අරගලය නිමා වී නැත, එහි තව දුරටත් නියැළෙමි, අවස්ථා සොයමි!
සේපාල්ලාට සහ රොහාන්ලාට මේ දේශපාලනය ග්‍රහණය නොවන්නේම නොදැනුවත්කම ට වඩා තක්කඩිකම නිසාය. ඒ දිනවලම මම ඒ සම්බන්ධයෙන් රොහාන් ට සහ සේපාල් ට දැක් වූ ප්‍රතිචාරය සේපාල් ගේ පැපරාසියාසඟරාවේ පළ වුණා..
නැවත අසමි! ඔවුන් ට අවශ්‍ය කුමක්ද?
දීප්ති, රොහාන්, නිර්මාල්, ධම්ම සහ තවත් අය 90 දශකයේ අවසන් කාලය වන විට කරමින් සිටි වැඩ ගැන එදවස ආරම්භ වූ “අපේ සංවාදය” තවම අවසන් නැත. රාවය සහ නිදහස් පත්තර වල මෙන්ම මා ලියූ “කූඹි” දක්වා වූ පොත් තුළ ද එය නැවතී තිබෙන බව මෙහි සටහන් කර තැබිය යුතුය. සේපාල් යන පුද්ගල සාධකය එහි ස්ථානගත කළ යුත්තේ කෙසේද යන්න යළි විමසා බැලිය යුතුය.
දීප්ති ඔය කියා තිබෙන, යථාර්ථය සහ අදහස් සමපාත වීම මෙන්ම ඒවා එකිනෙකට ප්‍රතිවිරුද්ධව පැවතී වෙන් කෙරෙන ශේෂය යථාර්ථය ලෙස ගැනීම වැනි තර්ක මෙවලම් ගැන එක දිගට කතා කරන්න ඕන නං අපට පුළුවන්. ඒත් ඊට වඩා සරල තැනකින් අපි පටන් ගම්මු!
දීප්තිලාට අවශ්‍ය කුමක්ද?
CHAPA
Dec 04, 2018