සුහදව වෙන් වෙමු!

නැහැ, නැහැ! ඔබට නෙවෙයි මේ කියන්නෙ!
දැන් මෙයත් එක්ක එකට ඉන්න බැහැ, අපෝ! මෙයත් එක්ක දැන් වැඩ කෙරුවා ඇති! මම හිතුවෙ එයා හොඳ කෙනෙක් කියලා...ඔන්න ඔහොම හිතලා - කියලා සමහරු එකිනකාගෙන් වෙන් වෙන්න හදනවානෙ. ඉතිං එහෙම වෙලාවක තරහා වෙන්නෙ නැතුව,  සුහදව එකතු වෙනවා වගේම ඕන නං සුහදව වෙන් වෙන්නත් පුළුවං.
අන්න ඒකයි මේ කියන්නෙ.
යාළු මිත්‍රයන් ට, කොටස් කරුවන් ට, ප්‍රේමවන්තයන් ට, විවාහකයන් ට...ඕන කෙනෙකුට මේ 'සුහද ක්‍රමය' අනුගමනය කරන්න පුළුවං, තව දුරටත් එකට ඉන්න හෝ වැඩකරන්න කැමැත්තක් නැත්තං.
දැන් සාමාන්‍යයෙන් වෙන්නෙ, එකට ඉඳලා මොකක් හරි හේතුවකට වෙන් වෙනකොට තරහකාරයො බවට පත්වෙන එක. වෛරක්කාරයො බවට පත්වෙන එක. සමහරු අර ආදරය කරපු, ලෙන්ගතු පාපු විදිහටම හෝ ඊටත් වැඩියෙන් ද්වේශ කරන්න ගන්නවා, වෛර කරන්න ගන්නවා.
ඇයි එහෙම වෙන්නෙ?
එහෙම වෙන්න බැහැ! සුහදව එකට වැඩ කරලා, එකිනෙකාට ආදරය කරලා, පස්සෙ පළිගන්න හිතෙන්නෙ කොහොමද? ඒ මනුෂ්‍ය ලක්ෂණයක් නං නෙවෙයි. අනෙක් සත්තු වුණත් එහෙම කරන්නෙ නැහැ, සාමාන්‍යයෙන්.
අපි මේ දැන් ඉඳලා වෙනස් විදිහකට හිතන්න පටන් ගම්මු!
අදාළ සම්බන්ධතාව ගොඩනගාගෙන - පවත්වාගෙන යන්න උපරිම අවස්ථා අරගෙන - අරගෙන බැරිම තැනදි අත හරින්න, හැබැයි සුහදව.
හොඳට මතක තියාගන්න! ඔබ, ඔබට සමීපව හිටපු කෙනෙකුට ද්වේශ කරනකොට - ඒ කෙනාගෙන් පළිගන්න හදනකොට, ඔබ සහ ඒ කෙනා වටේ ඉන්න දන්නා කියන බුද්ධිමත් අය, කෙළින් ඔබට නොකිව්වත් හිත යටින් හරි ඔබව ප්‍රතික්ෂේප කරනවා.
''අපෝ! මහා ජරා එකෙක් ( එකියක් )!'' කියලා හිත යටින් හරි ඔබට දොස් නගනවා. කෙනෙක් ඔබේ ඒ වැඩ පිලිගන්නවා නං, පරිස්සමින්! ඒ, වෙන යටි අරමුණක් ඇතුව.
අද මේ අලුත් දවසෙ, පටන් ගත්තෙ ලොකු කතාවක් වුණාට, කල්පනාවෙන් වැඩකෙරුවොත්, අමාරු වෙන්නෙ නැහැ.
මතකනෙ! සමුගන්නවා නං ඒ සුහදව විතරයි!
CHAPA
March 13, 2017